ჯანდაცვის მსოფლიო ორგანიზაცია (WHO) რუსეთში, შავი ჭირის საწინააღმდეგო სამეცნიერო-კვლევით ინსტიტუტში ლაბორატორიის თანამშრომლის გარდაცვალების ფაქტს ეხმაურება. ორგანიზაციის გენერალური დირექტორის, ტედროს ადანომ გებრეიესუსის განცხადებით, ჯანმო მიმდინარე მოვლენებსა და გავრცელებულ ცნობებს დეტალურად სწავლობს.
"ჩვენ ყურადღებით ვაკვირდებით რუსეთის ფედერაციაში მდებარე კვლევით ინსტიტუტში მომხდარ ტრაგიკულ შემთხვევასთან დაკავშირებულ ინფორმაციას. მსგავსი ინციდენტები ყოველთვის მოითხოვს განსაკუთრებულ სიფრთხილეს. ჯანმო მუდმივ რეჟიმში აკვირდება ვითარებას, რათა მივიღოთ სრული და გამჭვირვალე ინფორმაცია მომხდარის გამომწვევი მიზეზების შესახებ", - აღნიშნა ტედროს ადანომ გებრეიესუსმა.
ამ ეტაპზე დაზუსტებული არ არის, კონკრეტულად რა ვითარებაში დაიღუპა ლაბორატორიის თანამშრომელი და უკავშირდება თუ არა ფაქტი უშუალოდ სახიფათო პათოგენებთან მუშაობის პროცესში დაშვებულ შეცდომას ან უსაფრთხოების ნორმების დარღვევას. მსგავსი ტიპის დაწესებულებები მაღალი რისკის შემცველ ინფექციებზე, მათ შორის, შავ ჭირსა (ჭირის ბაქტერია - Yersinia pestis) და სხვა განსაკუთრებით საშიშ დაავადებებზე მუშაობენ, რაც ბიოუსაფრთხოების უმკაცრესი პროტოკოლების დაცვას მოითხოვს.
ჯანდაცვის მსოფლიო ორგანიზაცია ხაზს უსვამს ბიოუსაფრთხოების საერთაშორისო სტანდარტების ზედმიწევნით შესრულების კრიტიკულ მნიშვნელობას მაღალი დონის ლაბორატორიებში. ორგანიზაციის განმარტებით, მსგავსი დაწესებულებები ვალდებულნი არიან, უზრუნველყონ პერსონალის მაქსიმალური დაცვა, რათა თავიდან იქნეს აცილებული როგორც ინდივიდუალური დაინფიცირების, ისე პათოგენების გარემოში შესაძლო გავრცელების საფრთხე.
ჯანმო გააგრძელებს ფაქტის მონიტორინგს და საჭიროების შემთხვევაში, საზოგადოებას დამატებით ინფორმაციას მიაწვდის.
