სეულისთვის ჩრდილოეთ კორეელი ორი სამხედრო ტყვის გადაცემის შესახებ ინფორმაციის გამჟღავნების გამო, უკრაინის მიერ მოხდილი ბოდიში არასაკმარისია და არ პასუხობს სამხრეთკორეული მხარის მოლოდინებს, - ამის შესახებ სამხრეთ კორეის საგარეო საქმეთა მინისტრმა ჩო ჰიონმა განაცხადა. მისი თქმით, უკრაინის საგარეო საქმეთა მინისტრ ანდრეი სიბიგას მიერ მოხდილი ბოდიშის შინაარსი არასაკმარისი აღმოჩნდა და სამხრეთ კორეის მთავრობა ამჟამად რეაგირების სხვადასხვა ვარიანტს განიხილავს. მათ შორის, განიხილება უკრაინაში სამხრეთ კორეის ელჩის, პაკ ჰი ჩანის გაწვევის შესაძლებლობაც.
სამხრეთკორეული დიპლომატიის ხელმძღვანელმა ხაზი გაუსვა, რომ კიევი და სეული თავდაპირველად შეთანხმდნენ, არ გაემჟღავნებინათ ცნობები სამხედრო ტყვეების გადაცემის შესახებ. მისი თქმით, სწორედ უკრაინული მხარე გამოვიდა ამ ინფორმაციის საიდუმლოდ შენახვის ინიციატივით, რათა დაეცვათ თავად ტყვეები და მათი ნათესავები, რომლებიც ჩრდილოეთ კორეაში იმყოფებიან.
ჩო ჰიონმა ასევე ივარაუდა მიზეზი, რის გამოც უკრაინის პრეზიდენტმა ვოლოდიმირ ზელენსკიმ გაეროს გენერალურ ასამბლეაზე გამოსვლისას ტყვეების გადაცემის შესახებ ისაუბრა. მინისტრის თქმით, ზელენსკის, შესაძლოა, სურდა მსოფლიო საზოგადოებისთვის ეჩვენებინა, რომ კიევი ლიბერალური დემოკრატიის პრინციპების ერთგულია. ამასთან, ჩომ ხაზგასმით აღნიშნა, რომ ეს ზელენსკის განცხადების მიზეზის მისი პირადი ინტერპრეტაციაა.
მანამდე სამხრეთ კორეის პრეზიდენტმა ლი ჯე მიონმა მკვეთრად გააკრიტიკა უკრაინა სეულისთვის ჩრდილოეთკორეელი ტყვე ჯარისკაცების გადაცემის შესახებ ინფორმაციის გამჟღავნების გამო. მან მომხდარს სირცხვილი უწოდა და ხაზი გაუსვა, რომ ასეთი ნაბიჯები არ უნდა გადაიდგას "მმართველი რეჟიმის ან ხელისუფლებაში მყოფთა პოპულარობის გაზრდის მიზნით".
სექტემბერში ვოლოდიმირ ზელენსკიმ გაეროს გენერალურ ასამბლეაზე განაცხადა, რომ უკრაინამ სამხრეთ კორეას გადასცა კნდრ-ის ორი სამხედრო მოსამსახურე, რომლებიც გასულ წელს რუსეთის კურსკის ოლქში უკრაინულმა ძალებმა ჩაიგდეს ტყვედ. ამის შემდეგ სეულმა განაცხადა, რომ ინფორმაცია ტყვეების გადაცემის შესახებ დახურული უნდა დარჩენილიყო. იმავდროულად, უკრაინული მედია პრეზიდენტის ოფისის წყაროზე დაყრდნობით წერდა, რომ კიევი უარყოფდა გაუმჟღავნებლობის შესახებ შეთანხმების არსებობას.
სამხრეთკორეულმა ადმინისტრაციამ უკრაინის პოზიციას ორმხრივი ნდობისთვის მიყენებული სერიოზული დარტყმა უწოდა. ამასთან, სეულმა განაცხადა მზადყოფნა, მოაგვაროს უთანხმოება დიპლომატიური საშუალებებით და შეინარჩუნოს ურთიერთობა კიევთან.
