რუსულმა ჯარებმა სამშაბათს, 6 ოქტომბრის ღამით, უკრაინაზე დამრტყმელი უპილოტო საფრენი აპარატებით მორიგი იერიში მიიტანეს, რის შედეგადაც რამდენიმე რეგიონში დაშავდნენ ადამიანები და დაზიანდა ინფრასტრუქტურის ობიექტები.
უკრაინის შეიარაღებული ძალების საჰაერო ძალების მონაცემებით, რუსეთმა ჯამში 137 დამრტყმელი დრონი გაუშვა, მათ შორის, Shahed-ის, "გერბერას", "ბანდეროლის"/"დან-Т"-ს ტიპის დრონები და იმიტატორი აპარატები "პაროდია". 08:00 საათისთვის უკრაინის საჰაერო თავდაცვამ 114 სამიზნე ჩამოაგდო ან ჩაახშო. დარტყმები დაფიქსირდა 17 ადგილას, კიდევ ოთხ რაიონში კი ჩამოგდებული დრონების ნამსხვრევები აღმოაჩინეს.
ზაპოროჟიეში დილით მდინარე დნეპრზე მდებარე ხიდს დაესხნენ თავს. როგორც ზაპოროჟიეს საოლქო სამხედრო ადმინისტრაციის ხელმძღვანელის მოვალეობის შემსრულებელმა, მიხაილო სემიკინმა განაცხადა, დარტყმის შედეგების გამო ხიდზე მოძრაობის დროებით გადაკეტვა გახდა საჭირო. ბოლო მონაცემებით, სულ მცირე, ხუთი ადამიანი დაშავდა.
დაჭრილებს შორის არიან 24 და 59 წლის ქალები და 36 წლის მამაკაცი. კიდევ ორი დაშავებული, 43 და 54 წლის მამაკაცები, "წითელ ჯვარში" მუშაობენ: თავდასხმის დროს ისინი სამსახურში მიდიოდნენ. ყველა დაშავებულს სამედიცინო დახმარება უტარდება.
დნეპროპეტროვსკის ოლქში, ღამის განმავლობაში სამ რაიონზე უპილოტო საფრენი აპარატებით თითქმის 20 თავდასხმა დაფიქსირდა. საოლქო სამხედრო ადმინისტრაციის ხელმძღვანელმა, ოლექსანდრ განჟამ განაცხადა, რომ ნიკოპოლის რაიონში ორი ადამიანი დაიჭრა, დაზიანებულია კერძო სახლი და ავტომობილი.
ნიკოპოლის რაიონში დარტყმების ქვეშ მოექცა ნიკოპოლის, მარგანეცის, პოკროვსკის, ტომაკივკისა და ჩერვონოგრიგორივკის თემები. კრივი-რიჰის რაიონის ზელენოდოლსკის თემში თავდასხმის შემდეგ ხანძარი გაჩნდა, სინელნიკოვეში კი რუსეთის დარტყმა საწარმოს მოხვდა, სადაც ასევე ცეცხლი გაჩნდა.
ოდესაში რუსულმა ჯარებმა ღამით ინფრასტრუქტურულ ობიექტებზე მიიტანეს იერიში. ადგილობრივი ხელისუფლების ცნობით, თავდასხმას მსხვერპლი არ მოჰყოლია, არ დაზიანებულა საცხოვრებელი შენობები. მოგვიანებით ცნობილი გახდა ერთ-ერთი კერძო საწარმოს შენობის დაზიანების შესახებ.
დილით აფეთქებები გაისმა კიევშიც. ობოლონსკის რაიონში ნამსხვრევების ჩამოვარდნამ სასწავლო დაწესებულების სახურავზე ხანძარი გამოიწვია, თუმცა მაშველებმა ცეცხლი მალევე ჩააქრეს. დაშავებულების შესახებ ინფორმაცია არ გავრცელებულა.
უკრაინის საჰაერო ძალების ცნობით, რუსული დრონები გაუშვეს რუსეთის ფედერაციის ტერიტორიიდან, დონეცკის ოლქის ოკუპირებული რაიონებიდან და ყირიმიდან, ასევე აზოვის ზღვის აკვატორიიდან. თავდასხმა 08:00 საათის შემდეგაც გრძელდებოდა.
