კანადის მთავრობა უკრაინის სამხედრო დახმარების ახალ პაკეტს აანონსებს. ოტავა კიევს, საჰაერო თავდაცვის სისტემებისთვის საჭირო რაკეტების შესაძენად, 350 მილიონ კანადურ დოლარს გამოუყოფს.
აღნიშნული გადაწყვეტილება მიზნად ისახავს უკრაინის საჰაერო სივრცის გაძლიერებას, კრიტიკული ინფრასტრუქტურის დაცვას და ქვეყნის მოსახლეობის უსაფრთხოების უზრუნველყოფას, განსაკუთრებით მომავალი ზამთრის რთული სეზონის წინ. კანადის თავდაცვის სამინისტროში აცხადებენ, რომ საჰაერო თავდაცვის სფეროში არსებული გამოწვევების ფონზე, თანამედროვე შეიარაღების მიწოდება კრიტიკულ პრიორიტეტს წარმოადგენს.
"ჩვენი მხარდაჭერა უკრაინის მიმართ ურყევია. კანადა აგრძელებს თავდაცვითი შესაძლებლობების განმტკიცებას, რათა უკრაინელმა ხალხმა შეძლოს საკუთარი ქვეყნისა და სუვერენიტეტის დაცვა. ეს ახალი დაფინანსება უზრუნველყოფს სასიცოცხლოდ მნიშვნელოვანი რაკეტების მიწოდებას, რომლებიც იცავენ ქალაქებსა და სამოქალაქო ინფრასტრუქტურას", — აღნიშნულია კანადის მთავრობის განცხადებაში.
უკრაინის ხელმძღვანელობამ კანადელ პარტნიორებს მადლობა გადაუხადა მუდმივი და ეფექტიანი დახმარებისთვის. კიევში ხაზს უსვამენ, რომ კანადა რუსული აგრესიის წინააღმდეგ ბრძოლის პირველივე დღეებიდან ერთ-ერთი ყველაზე სანდო და აქტიური მოკავშირეა, რომელიც უკრაინას, როგორც ჰუმანიტარული, ისე სამხედრო და ფინანსური მიმართულებით მნიშვნელოვან რესურსებს უყოფს.
