გერმანიაში თავშესაფრის მოთხოვნის შესახებ ახალი განაცხადების რაოდენობა 2026 წლის ოქტომბერში 2011 წლის შემდეგ ყველაზე დაბალ მაჩვენებლამდე შემცირდა. ამის შესახებ გაზეთი Bild გერმანიის ფედერალური შინაგან საქმეთა სამინისტროს მონაცემებზე დაყრდნობით იტყობინება.
უწყების სტატისტიკის თანახმად, ამ წლის ოქტომბერში ქვეყანაში თავშესაფრის მოთხოვნის 5 707 პირველადი განაცხადი და დაცვის პროცედურით ქვეყანაში ახლად ჩასული პირი დარეგისტრირდა. ეს 40%-ით ნაკლებია გასული წლის ანალოგიურ პერიოდთან შედარებით — და 70%-ით ნაკლები, ვიდრე 2024 წელს.
როგორც Bild აღნიშნავს, ბოლოს უფრო დაბალი მაჩვენებელი 2011 წელს დაფიქსირდა. მაშინ საუბარი იყო 4 106 განაცხადზე. გაზეთთან კომენტარში ფედერალურმა შინაგან საქმეთა მინისტრმა, ალექსანდერ დობრინდტმა განაცხადა, რომ ეს არის გარდამტეხი მომენტი არალეგალურ მიგრაციასთან მთავრობის ბრძოლაში.
გერმანიის კანცლერის თანამდებობაზე ფრიდრიხ მერცის მოსვლის შემდეგ, ქვეყნის მთავრობამ მიგრაციული პოლიტიკის გამკაცრება დაიწყო. კერძოდ, გერმანიის შსს-მ მეზობელ ქვეყნებთან საზღვარზე სასაზღვრო კონტროლი გააძლიერა და მიგრანტებისთვის ქვეყანაში შესვლაზე უარის თქმა დაიწყო.
პოლიციის სტატისტიკის მონაცემებით, რომელსაც Bild ეყრდნობა, 2025 წლის მაისიდან გერმანიაში შესვლაზე უარი 47 551 ადამიანს ეთქვა. კიდევ 2 432 პირი ქვეყანაში გერმანიაში განმეორებით შესვლის მოქმედი აკრძალვის გამო არ დაუშვეს. გარდა ამისა, ქვეყანაში ძალაში შევიდა კანონი დარჩენის უფლების არმქონე პირთა გამარტივებული დეპორტაციის შესახებ.
2025 წლის ივლისში გერმანიაში ასევე დროებით შეაჩერეს ოჯახის გაერთიანების შესახებ დებულებების მოქმედება იმ პირებისთვის, რომლებსაც არ აქვთ ლტოლვილის სტატუსი, თუმცა სარგებლობენ სუბსიდიური დაცვით. ქვეყნის ფედერალური მიწების ნაწილმა ასევე შეზღუდა სოციალური განაცემები თავშესაფრის მაძიებელთა ცალკეული კატეგორიებისთვის.
