ევროპის კონტინენტზე ფერმერების მასშტაბური საპროტესტო აქციების მიუხედავად, ევროპის კავშირმა კლიმატის ცვლილების წინააღმდეგ ბრძოლასთან და ბუნების აღდგენასთან დაკავშირებულ გეგმას, რომელიც მწვანე შეთანხმების ნაწილს წარმოადგენს, მხარი დაუჭირა.
”დღეს ევროპისთვის მნიშვნელოვანი დღეა, რადგან ჩვენ ბუნების დაცვიდან და კონსერვაციიდან, მის აღდგენაზე გადავდივართ“, - სეზარ ლუენა, ევროპარლამენტარი.
კანონპროექტი 329 ხმით 275-ის წინააღმდეგ მიიღეს. ბუნების აღდგენის კანონი ძალაში შესვლამდე ევროპის კავშირის საბჭომ უნდა დაამტკიცოს.
„ევროპის სახალხო პარტიამ - EPP“ კანონპროექტის წინააღმდეგ მისცა ხმა, რადგან მისი აზრით, ახალი კანონი ევროპელ ფერმერებს მძიმე ტვირთად დააწვებათ.
ევროპის კავშირის მწვანე შეთანხმების მიხედვით, 2050 წლისთვის აღარ იქნება სათბურის აირების გაფრქვევა; ეკონომიკური ზრდა აღარ იქნება დამოკიდებული რესურსების გამოყენებაზე; არცერთი ადამიანი და არცერთი ადგილი არ დარჩება მწვანე შეთანხმების მიღმა. შეთანხმება ეკოლოგიურად სუფთა ტექნოლოგიებში ინვესტირებას, ენერგეტიკის სექტორის დეკარბონიზაციას, შენობების მეტი ენერგოეფექტურიბით უზრუნველყოფას, გლობალური გარემოსდაცვითი სტანდარტების გაუმჯობესებას და ა.შ. ითვალისწინებს.
„ეს კანონი არ ეხება ბუნების აღდგენას მხოლოდ ბუნების გულისთვის. ახალი კანონი შექმნის სასიცოცხლო გარემოს, რომელშიც ამჟამინდელი და მომავალი თაობების კეთილდღეობა იქნება უზრუნველყოფილი“, - ვირჯინიუს სინკევიჩიუსი, ევროკომისარი გარემოს დაცვის, ოკეანეებისა და თევზჭერის საკითხებში.
