ესტონეთის თავდაცვის მინისტრმა, ჰანო პევკურმა გადადგომის შესახებ განაცხადა. აღნიშნული გადაწყვეტილება ქვეყნის თავდაცვის სექტორში გამოვლენილ ფინანსურ დარღვევებსა და სახელმწიფო აუდიტის კრიტიკულ ანგარიშს მოჰყვა.
ჰანო პევკურმა საზოგადოებრივი მაუწყებლის ეთერში განაცხადა, რომ იგი იღებს პოლიტიკურ პასუხისმგებლობას თავდაცვის სექტორში არსებულ ხარვეზებზე, მიუხედავად იმისა, რომ უშუალოდ კონტრაქტების მომზადებასა და ტექნიკურ დეტალებში მონაწილეობა არ მიუღია.
გადადგომის მთავარ საფუძვლად ქცეული შესყიდვების საქმე ეხება უკრაინისთვის საჭირო საარტილერიო ჭურვების შეძენის მცდელობას. ესტონურმა მხარემ დაახლოებით 70 მილიონი ევროს ოდენობის თანხა გადაურიცხა შუამავალ კომპანიას. როგორც ირკვევა, კონტრაქტში ფიგურირებდა კომპანია, რომელსაც მსგავსი სამხედრო ტვირთით ვაჭრობის გამოცდილება არ ჰქონია, რამაც მიწოდების შეფერხება და ფინანსური რისკები გამოიწვია.
ეროვნული აუდიტის სამსახურის ანგარიშში მკაცრადაა გაკრიტიკებული ქვეყნის თავდაცვის ძალებისა და თავდაცვის ინვესტიციების ცენტრის მიერ ფინანსების მართვის, ინვენტარიზაციისა და კონტრაქტების მონიტორინგის პროცესი. აუდიტორებმა აღნიშნეს, რომ გამოვლინდა მნიშვნელოვანი ხარვეზები, რომლებმაც სახელმწიფო ბიუჯეტისთვის პოტენციური ზარალის რისკი შექმნა.
ჰანო პევკური, რომელიც ესტონეთის თავდაცვის უწყებას 2022 წლიდან ხელმძღვანელობდა, მოვალეობას პრემიერ-მინისტრის მიერ ახალი კანდიდატის ოფიციალურად დამტკიცებამდე შეასრულებს. მომხდარ ფაქტებთან დაკავშირებით ესტონეთის პროკურატურამ და სამართალდამცავმა უწყებებმა გამოძიება დაიწყეს.
