აშშ-ის პრეზიდენტმა დონალდ ტრამპმა ევროპაში მიმდინარე მიგრაციულ პროცესებთან დაკავშირებით მკაცრი განცხადება გააკეთა. ტრამპის თქმით, ევროპული ქვეყნების მხრიდან "დამნაშავეებისა და არასასურველი პირების" მიღებამ კონტინენტზე უსაფრთხოების კრიზისი გამოიწვია.
ამერიკელმა ლიდერმა აღნიშნა, რომ მიგრაციული ნაკადების არაკონტროლირებადი მართვის შედეგად, ევროპა თავისი კულტურული და სოციალური იერსახის დაკარგვის საფრთხის წინაშე დგას და ფაქტობრივად "მესამე სამყაროს" მოვლენებს ემსგავსება. ტრამპმა ხაზი გაუსვა, რომ აშშ-ის საიმიგრაციო პოლიტიკა ევროპისთვის მაგალითი უნდა იყოს და კონტინენტმა "საკუთარი საზღვრების დაცვაზე და კანონის უზენაესობაზე უნდა იზრუნოს".
ტრამპის ეს განცხადება ნაწილია მისი ფართო პოლიტიკური რიტორიკისა, რომელიც დასავლურ სამყაროში იმიგრაციისა და საზღვრების დაცვის პოლიტიკის გადახედვას მოითხოვს. ევროპელი პოლიტიკოსების ნაწილი ტრამპის კრიტიკას კატეგორიულად არ ეთანხმება, თუმცა საკითხი ევროპულ დებატებში კვლავ ერთ-ერთ ყველაზე მწვავე თემად რჩება.
