"პრეზიდენტ ტრამპის გადასაწყვეტია, რას დაუძახებს პუტინს. და, რა თქმა უნდა, ჩვენთვის ის მტერია. და, რა თქმა უნდა, ჩვენთვის ის მკვლელია. ვფიქრობ, მთელ მსოფლიოში ადამიანების უმეტესობისთვისაც ის მკვლელია, რადგან ის კლავს. სხვათა შორის, ის კლავს ყოველდღე და ყოველღამე", — უპასუხა უკრაინის პრეზიდენტმა ვოლოდიმირ ზელენსკიმ CNN-ის წამყვანის კითხვას პირდაპირ ეთერში.

ზელენსკიმ ხაზგასმით აღნიშნა, რომ რუსეთის ფედერაციის პრეზიდენტი ვლადიმირ პუტინი არა მხოლოდ ჯარისკაცების, არამედ მშვიდობიანი მოქალაქეების მკვლელიცაა. მისივე თქმით, მიმდინარე წელს რუსეთმა უკრაინის წინააღმდეგ თითქმის ხუთი წლის წინ გაჩაღებულ ომში ბრძოლის ველზე წარმატებას ვერ მიაღწია, ხოლო რუსეთის საოკუპაციო ჯარებმა ორი შეტევითი ოპერაცია ჩააგდეს. "სწორედ ამიტომ გადაწყვიტეს მათ მშვიდობიანი მოქალაქეების დახოცვა, მასირებული იერიშების მიტანა ჩვენს ინფრასტრუქტურაზე, კრიტიკულ ინფრასტრუქტურაზე, ყველა ხიდზე, ყველა რკინიგზის სადგურზე და ყველაფერ დანარჩენზე — სკოლებზე, ეკლესიებზე", — განაცხადა უკრაინის პრეზიდენტმა.

ვოლოდიმირ ზელენსკიმ აღნიშნა, რომ სწორედ ამ მიზეზით პუტინი, როდესაც მასზე საუბრობენ, როგორც კოლეგაზე, მეგობარზე ან რაიმე მსგავსზე, ვერ გრძნობს, რომ მკვლელია. "ის საკმარის ზეწოლას ვერ გრძნობს. არ ვიცი, ეს მისთვის წითელი შუქია თუ მწვანე შუქი გასაგრძელებლად, მაგრამ ეს მას არ აჩერებს. ამიტომ ის გრძნობს, რომ შეუძლია გააგრძელოს", — განმარტა უკრაინის პრეზიდენტმა CNN-ის ეთერში.

19 ნოემბერს აშშ-ის პრეზიდენტი დონალდ ტრამპი ჩინეთის ქალაქ შენჯენში აზია-წყნარი ოკეანის ეკონომიკური თანამშრომლობის (APEC) სამიტის ფარგლებში პუტინს სიტყვებით "ჩემო მეგობარო" მიესალმა.