აშშ-ის თავდაცვის დეპარტამენტი საჰაერო და სარაკეტო თავდაცვის სტრატეგიული ინფრასტრუქტურის გაძლიერებას იწყებს. პენტაგონმა მიიღო გადაწყვეტილება, მნიშვნელოვნად გაზარდოს Patriot-ისა და THAAD-ის კომპლექსებისთვის განკუთვნილი რაკეტების წარმოების მოცულობა.
ეს ნაბიჯი პირდაპირ კავშირშია გლობალური უსაფრთხოების არასტაბილურ გარემოსთან და მსოფლიოს სხვადასხვა ცხელ წერტილში ამ ტიპის მაღალტექნოლოგიურ შეიარაღებაზე გაზრდილ მოთხოვნასთან. ბოლო პერიოდის კონფლიქტებმა ნათლად აჩვენა, რომ თანამედროვე საბრძოლო მოქმედებებში სარაკეტო თავდაცვის მარაგები სწრაფად ილევა, რის გამოც, ვაშინგტონი თავდაცვითი ინდუსტრიული ბაზის პოტენციალის მაქსიმალურად ათვისებას ცდილობს.
პროგრამის ფარგლებში დაფინანსდება არსებული საწარმოო ხაზების მოდერნიზაცია, შეიქმნება დამატებითი სიმძლავრეები და კონტრაქტორებს მიეცემათ მკაფიო ვალდებულება, რომ Patriot-ისა და THAAD-ის რაკეტების გამოშვების ტემპი უახლოეს წლებში რამდენჯერმე გაიზარდონ.
აღნიშნული ინიციატივა მიზნად ისახავს არა მხოლოდ თავად აშშ-ის შეიარაღებული ძალების სტრატეგიული მარაგების სწრაფ შევსებას, არამედ ძირითადი მოკავშირეებისა და პარტნიორი ქვეყნების უსაფრთხოების გარანტიების განმტკიცებას, რათა თავიდან იქნეს აცილებული საჰაერო ფარის დეფიციტი სერიოზული სარაკეტო საფრთხეების პირობებში.
