რუსა მორჩილაძე: აუდიტის დასკვნამ, საავტორო უფლებების დაცვის ასოციაციაში არსებულ დარღვევებზე, ჩემი ეჭვები დაადასტურა

საავტორო უფლებების დაცვა უკვე 
როგორც აღმოჩნდა, ძველი ასოციაციის მიმართ ავტორთა პრეტენზიები  არ იყო უსაფუძვლო და ორგანიზაციაში ბოლოს ჩატარებულმა ფინანსურმა აუდიტმა ეს ყველაფერი დაადასტურა - გუშინ პარლამენტში კულტურის კომიტეტის სხდომა გაიმართა, სადაც „საქპატენტის“ თავმჯდომარემ სოსო გიორგაძემ საქართველოს საავტორო უფლებათა ასოციაციაში (GCA) ჩატარებული აუდიტის დასკვნა წარმოადგინა, რომელშიც საუბარია ასოციაციაში თანხების არამიზნობრივ ხარჯვაზე.
აღმოჩნდა, რომ მხოლოდ 2022 წელს ასოციაციის ადმინისტრაციამ საკუთარი ფუნქციონირებისათვის დახარჯა 2,2 მლნ ლარი, ხოლო საავტორო და მომიჯნავე უფლებების ქართველ და უცხოელ მფლობელებს 400 ათასი ლარით ნაკლები, მხოლოდ 1,8 მლნ ლარი გაუნაწილა, საიდანაც 700 ქართველ ავტორს ჯამურად სულ რაღაც ერთი მილიონი ლარი ერგო.
ასოციაციის გამგეობის თავმჯდომარემ გიგა კობალაძემ, 2021 წელს სარგებლის სახით  233 ათასი ლარი მიიღო  (მათ შორის, ხელფასის სახით 150 ათასი ლარი, ხოლო პრემიის, ბონუსის და სხვადასხვა სახის სარგებლის სახით - დამატებით 83 ათასი ლარი). შესაბამისად, ასოციაციის მიერ მხოლოდ თავმჯდომარეზე გაწეულმა საშუალო ყოველთვიურმა ხარჯმა 2021 წელს 19,4 ათასი ლარი შეადგინა.
აუდიტის სკანდალური დასკვნის გასაჯაროების შემდეგ „აიპრესი“ ქართველ მუსიკოსებს, შემსრულებლებს, მწერლებს და ავტორებს დაუკავშირდა და განვითარებული მოვლენების შეფასება სთხოვა.

კომპოზიტორი და მუსიკოსი რუსა მორჩილაძე აცხადებს, რომ აუდიტის გამოქვეყნებულმა დასკვნამ მისი ეჭვები დაადასტურა: „აუდიტის დასკვნა, რაც გამოქვეყნდა, ჩემი ეჭვების მხოლოდ დადასტურებაა. ჩემთვის აქ სიახლე არაფრია. 
რაც შეეხება დასკვნაში მოცემულ ციფრებს, ეს არის აუდიტის მიერ შესწავლილი ციფრები და ამაზე არ შემიძლია გავაკეთო რაიმე კომენტარი, ეს არ არის ჩემი პრეროგატივა და არც ჩემი კომპეტენცია. მე უბრალოდ ვიყავი უკმაყოფილო, როგორც ავტორი და ჩემი ეჭვების საფუძველზე გამოვთქვამდი პრეტენზიებს. 
ამის გამო ჩემსა და ჯისიეის შორის სულ კომფლიქტური სიტუაცია იყო. როდესაც ალტერნატიული ასოციაცია გაჩნდა, მე იქ კი არ გადავედი, გავიქეცი სიხარულით და არ ვნანობ ამას. ვუსურბვებ „გერას“ გაძლიერებას, სამართლიან ურთიერთობას ავტორებთან“.
ბრალდებებს უარყოფს საავტორო უფლებათა დაცვის ასოციაციის თავმჯდომარე გიგა კობალაძე და აცხადებს, რომ მათთან უბრალოდ ვერ იქნება კორუფცია, ამის რეალური შესაძლებლობაც კი არ არსებობს. „დასკვნაში საუბარია აღრიცხვის მეთოდის დარღვევაზე, მაგრამ ეს არის წვრილმანი დარღვევა, რომელიც მომდინარეობს ჯერ კიდევ 2005 წლიდან, ამაზე სახელმწიფოს ვალდებულება იყო გაეკეთებინა რეაგირება, თუმცა დღემდე არ არის“ - აცხადებს კობალაძე.