უკრაინაში ომის მიუხედავად, აშშ და ევროპა რუსეთთან მრავალმილიარდიან ბიზნესს კვლავ აწარმოებენ, – ამის შესახებ „სიენენი“ წერს.
როგორც მედიასაშუალების ინფორმაციაშია აღნიშნული, აშშ-ის პრეზიდენტმა ინდოეთს რუსეთიდან ნავთობის იმპორტირებისა და ამით უკრაინაში ომის დაფინანსებისთვის ხელის შეწყობის გამო არსებული ტარიფები გაუორმაგა, რის შედეგადაც, შტატებში შესული ინდური საქონელი 50%-ით დაიბეგრება. თუმცა აშშ და ევროპაც თავად აწამოებენ სავაჭრო ურთიერთობებს რუსეთთან. ამას კი ინდოეთი „უსამართლობად“ მიიჩნევს და აღნიშნავს, რომ მოსკოვთან ბიზნესს სხვა ქვეყნებიც აწარმოებენ.
„სიენენის“ ცნობით, აშშ-სა და რუსეთს შორის სავაჭრო ურთიერთობები უკრაინაში ომის დაწყების შემდეგ 90%-ით შემცირდა, თუმცა გასულ წელს აშშ-მა რუსეთიდან სამი მილიარდი დოლარის ღირებულების პროდუქცია შეიძინა.
„აშშ-ს რუსეთიდან შეაქვს: სასუქი – წლის პირველი ნახევრის მონაცემებით, მათი ღირებულება 927 მილიონი დოლარია. გასულ წელს კი ერთ მილიარდს გადააჭარბა; პალადიუმი – 2024 წელს აშშ-მა შეიძინა – 878 მილიონი დოლარის, 2025 წლის პირველ ნახევარში კი 594 მილიონის ღირებულების; ურანი და პლუტონიუმი – მხოლოდ წელს შეერთებულმა შტატებმა 755 მილიონი დოლარის ღირებულების იყიდა.
ევროკავშირმა კი, რომელიც ამერიკის პარტნიორია რუსეთის წინააღმდეგ დაწესებულ სანქციებში, 2024 წელს 36 მილიარდი ევროს ღირებულების რუსული პროდუქციის იმპორტი განახორციელა.
ევროკავშირმა 2022 წლის პირველი კვარტალიდან 2025 წლამდე რუსული იმპორტი 86%-ით შეამცირა.
ევროკავშირი რუსეთისგან ყიდულობს: ნავთობს – მიმდინარე წელს იმპორტმა 1.48 მილიარდი ევრო შეადგინა; ბუნებრივ აირს – 2025 წლის პირველ ნახევარში 4.49 მილიარდი ევროს ოდენობით; მეტალსა და ფოლადს – მიმდინარე წელს 730 მილიონი ევროს ღირებულებით ; სასუქს – 2025 წლის პირველ ნახევარში 550 მილიონი ევროს ოდენობით; ნიკელს – 260 მილიონი ევროს ღირებულებით“, – ნათქვამია სტატიაში.
ასევე, როგორც „სიენენი“ წერს, ასობით დასავლური კომპანია კვლავ ოპერირებს რუსეთში. „იელის მენეჯმენტის“ სკოლის მიერ შედგენილი სიის მიხედვით, მათ შორისაა 100 უმსხვილესი ამერიკული და ათობით ევროპული კომპანია.
„შემოსავალი, რაც დასავლურ კომპანიებს კრემლისთვის მოაქვთ, გაცილებით მცირეა, თუმცა, ანალიტიკოსების შეფასებით, კომპანიები, რომლებიც დარჩნენ, შესაძლებლობას აძლევენ რუსეთის მოსახლეობას, განაგრძონ ცხოვრების ჩვეული წესი“, – აღნიშნულია „სიენენის“ ინფორმაციაში.
რაც შეეხება ინდოეთს, „სიენენის“ სტატიის მიხედვით, 2024 წელს ქვეყანამ რუსეთიდან 67 მილიარდი დოლარის ღირებულების პროდუქციის იმპორტი განახორციელა. აქედან ნავთობპროდუქტებსა და ნედლ ნავთობზე 53 მილიარდი მოდის. 2021 წლამდე კი ეს მაჩვენებელი 8.7 მილიარდი იყო.
ომის დაწყების შემდეგ რუსული ნედლი ნავთობის შეძენა ასევე გაზარდა ჩინეთმაც. ჩინეთმა 2024 წელს რუსეთიდან 130 მილიარდი დოლარის ღირებულების პროდუქციის იმპორტი განახორციელა და აქედან ნავთობპროდუქტებსა და ნედლ ნავთობზე 62.6 მილიარდი დოლარი მოდის.
თარგმანი: პირველი არხი
