პაპილომა ვირუსზე ვაქცინაციის ასაკი გაიზარდა 26 წლამდე. ეს ამ ასაკობრივი ჯგუფისთვის ნამდვილი საჩუქარია, რადგან ფასიანი ვაქცინის კურსი ათასობით ლარი ჯდებოდა და თანაც რთული საშოვნელი იყო. ამ შანსის არ გამოყენება არ შეიძლება, რადგან ეს არის ქალებისთვის უმნიშვნელოვანესი ვაქცინა. ის იცავს ქალთა სიკვდილიანობის ერთ-ერთი ხშირი მიზეზის - საშვილოსნოს ყელის კიბოსგან. ანუ ეს არის ვაქცინა სიმსივნის წინააღმდეგ! - ამის შესახებ ინფექციონისტი მაია ბუწაშვილი სოციალურ ქსელში წერს.
"ვაქცინა იცავს პაპილომა ვირუსების მაღალი რისკის (ანუ კიბოს გამომწვევი) ყველაზე ხშირი ტიპებისგან.
ამ ვაქცინის ირგვლივ ბევრი უსაფუძვლო მითი არსებობს. ერთ-ერთი მითი (რომლის გავრცელებაშიც, სამწუხაროდ, ზოგიერთი ექიმიც მონაწილეობს) არის ის, რომ ეს ვაქცინა იწვევს უშვილობას. ასობით კვლევა ადასტურებს, რომ პაპილომა ვირუსის ვაქცინასა და უშვილობას შორის კავშირი არ არსებობს. ეს ვაქცინა უკვე ოცი წელია გამოიყენება ბევრ ქვეყანაში. მილიონობით აცრილ ქალს შორის უშვილობის რაიმე გაზრდილი მაჩვენებელი არ აღინიშნება.
ამიტომ სანამ ვინმეს ამ არგუმენტით გადავაფიქრებინებთ იმ ვირუსზე აცრას, რომელიც კიბოს იწვევს, დავფიქრდეთ, რის საფუძველზე ვიღებთ თავზე ამხელა პასუხისმგებლობას და ადამიანს კიბოს რისკის წინაშე ვაყენებთ. უბრალოდ ყურმოკრული და დაუსაბუთებელი ინფორმაციის გამო სხვა ადამიანის სიცოცხლეს რატომ ვაყენებთ საფრთხის ქვეშ?" - წერს მაია ბუწაშვილი.
