დედაქალაქის მერმა 2008 წლის აგვისტოს ომში დაღუპულთა ხსოვნას პატივი მიაგო.
კახა კალაძემ მუხათგვერდის ძმათა სასაფლაოზე პრეზიდენტ მიხეილ ყაველაშვილთან, პრემიერ-მინისტრ ირაკლი კობახიძესთან, პარლამენტის თავმჯდომარე შალვა პაპუაშვილთან და მინისტრთა კაბინეტის წევრებთან ერთად,
ომში გარდაცვლილ გმირთა მემორიალი გვირგვინით შეამკო.
როგორც თბილისის მერმა აღნიშნა, აღნიშნულმა ომმა დაგვანახა, თუ როგორი არ უნდა იყოს ხელისუფლება.
„8 აგვისტო არის ტრაგიკული თარიღი საქართველოს უახლეს ისტორიაში, რომელმაც ქვეყანას უდიდესი ადამიანური დანაკარგი და უმძიმესი პოლიტიკური, ეკონომიკური, სოციალური შედეგები მოუტანა. ჩვენ ამ ომში ბევრი მებრძოლი ჯარისკაცი და პოლიციელი დავკარგეთ. დაიღუპა მშვიდობიანი მოსახლეობა.
დავკარგეთ ტერიტორიები. მივიღეთ ძალიან მძიმე შედეგები. ათი ათასობით ადამიანი საკუთარ სამშობლოში დევნილად იქცა.
აგვისტოს ომმა დაგვანახა, თუ როგორი არ უნდა იყოს ხელისუფლება, დაგვანახა მხოლოდ შეშფოთებული საერთაშორისო საზოგადოება.
მე კიდევ ერთხელ ქედს ვიხრი ჩვენი მებრძოლების წინაშე. მათი სახელი უკვდავია ისევე, როგორც მარადიულია საქართველო, მისი თავისუფლება და სუვერენიტეტი“, - განაცხადა კახა კალაძემ.
