2016 წლიდან, მთაწმინდის რაიონში შემავალი სოფლების - წავკისის, კოჯრისა და კიკეთის წყალმომარაგება მკვეთრად გაუმჯობესდება,-ამის შესახებ "ჯორჯიან უოთერ ენდ ფაუერი" იუწყება. როგორც კომპანიიდან იუწყებიან, სამუშაოები უკვე დაწყებულია.
თბილისის საკრებულოსა და „ჯორჯიან უოთერ ენდ ფაუერის“ ახალი მენეჯმენტის ინიციატივის ფარგლებში, ერთობლივი სამუშაო ჯგუფის მიერ დაგეგმილი წყალსადენის ინფრასტრუქტურის რეაბილიტაციის პროცესი, დღეს, მთაწმინდის რაიონის გამგებელმა, გელა არჩვაძემ და „ჯორჯიან უოთერ ენდ ფაუერის“ ოპერაციების მართვის დირექტორმა, მამუკა კიკალიშვილმა კოჯორსა და კიკეთში დაათვალიერეს.
კომპანიის ცნობით, სამუშაოები, რომელიც წავკისში, კოჯორსა და კიკეთში წყალმომარაგების გასაუმჯობესებლად ტარდება, თბილისის საკრებულოს, მთაწმინდის რაიონის გამგეობისა და GWP-ის წარმომადგენლებისგან შემდგარმა სამუშაო ჯგუფმა ერთობლივად დაგეგმა. კერძოდ, სამივე სოფლის 20-ზე მეტ ქუჩაზე, მთლიანად ახლდება წყალსადენის მოძველებული კომუნიკაციები - იცვლება ქსელები, მონტაჟდება ახალი ჩამკეტ-მარეგულირებელი ურდულები და ეწყობა ახალი საკვანძო ჭები. საერთო ჯამში, სამივე სოფელში ახლით იცვლება 20 კმ-ზე მეტი სხვადასხვა დიამეტრის გამანაწილებელი ქსელები. სარეაბილიტაციო სამუშაოებს „ჯორჯიან უოთერ ენდ ფაუერი“ ერთ თვეში დაასრულებს.
თბილისის საკრებულოსა და “ჯორჯიან უოთერ ენდ ფაუერის” ახალი მენეჯმენტის ინიციატივა, რაც ინფრასტრუქტურული სამუშაოების კოორდინირებულად წარმართვისთვის ერთობლივი სამუშაო ჯგუფების შექმნას ითვალისწინებს, თვეზე მეტია, რაც ამოქმედდა. დედაქალაქის ყველა რაიონში შექმნილია საკრებულოს, რაიონული გამგეობებისა და „ჯორჯიან უოთერ ენდ ფაუერის“ წარმომადგენლებისგან შემდგარი სამუშაო ჯგუფები, რომლებიც ინფრასტრუქტურის გაუმჯობესების მიზნით ჩასატარებელ სამუშაოებს, მათ შორის წყალსადენისა და წყალარინების ქსელების რეაბილიტაციას, ერთობლივად გეგმავენ. სამუშაო ჯგუფები ტექნიკური სამუშაოების დადგენილ ვადებში დასრულებასაც უწევენ მონიტორინგს.
