ცესკოს თავმჯდომარემ, გიორგი კალანდარიშვილის განცხადებით , პარლამენტში 14:00 საათამდე გაგრძელდება ხმის მიცემა კოლეგიის წევრების მიერ და, შესაბამისად, სწორედ ამ დრომდე შეუძლიათ მათ, დააფიქსირონ საკუთარი პოზიცია
„საარჩევნო კოლეგიაში განახლდა მონაწილეთა რაოდენობა. დღევანდელი კენჭისყრა პირდაპირი ეთერის მეშვეობით გადაიცემა და საზოგადოებას აქვს შესაძლებლობა, თვალი მიადევნოს აღნიშნული პროცესის მიმდინარეობას. ამასთან, აღსანიშნავია, რომ დილის 09:00 საათიდან დღის 14:00 საათამდე საარჩევნო კოლეგიის წევრს აქვს შესაძლებლობა, გამოცხადდეს და მიიღოს არჩევნებში მონაწილეობა. ამ ეტაპზე ვისი გვარებიც იქნა ამოკითხული, თუ არ იმყოფებოდნენ ისინი სხდომათა დარბაზში, მათ 14:00 საათამდე, ნებისმიერ დროს აქვთ შესაძლებლობა, გამოცხადდნენ და მიიღონ არჩევნებში მონაწილეობა.
კენჭისყრის დასრულების შემდეგ ცესკო შეიკრიბება, გამართავს სხდომას, სადაც განხორციელდება შედეგების დათვლა და შესაბამისი შემაჯამებელი ოქმის შედგენა. შემდეგ ისევ შევიკრიბებით სხდომათა დარბაზში და საზოგადოებას გავაცნობთ შედეგებს“, – განაცხადა გიორგი კალანდარიშვილმა.
პარლამენტის სასახლეში კენჭისყრის პროცესი 09:00 საათიდან დაიწყო და 14:00 საათამდე გაგრძელდება.
კანონმდებლობის მიხედვით, არჩევნების ჩასატარებლად საკმარისია საარჩევნო კოლეგიის სრული შემადგენლობის უმრავლესობის – მინიმუმ 151 წევრის დასწრება, ხოლო პრეზიდენტის ასარჩევად საჭიროა კოლეგიის სულ მცირე 200 წევრის ხმა.
საარჩევნო კოლეგიის მიერ არჩეული პრეზიდენტი თანამდებობას ხუთი წლის ვადით დაიკავებს.
რაც შეეხება საარჩევნო კოლეგიას, ის 300-წევრიანია. კოლეგიის შემადგენლობაში არიან – პარლამენტის 150 წევრი, აჭარის ავტონომიური რესპუბლიკის უმაღლესი წარმომადგენლობითი ორგანოს ყველა წევრი – 21 დეპუტატი, აფხაზეთის ავტონომიური რესპუბლიკის უმაღლესი წარმომადგენლობითი ორგანოს 20 წევრი და საკრებულოების 109 წევრი.
ადგილობრივი თვითმმართველობის ორგანოების 109 წევრიდან „ქართულ ოცნებას“ 54 წევრი უნდა წარედგინა, ხოლო რვა ოპოზიციურ პარტიას – 55. იმის გამო, რომ ოპოზიციამ საარჩევნო კოლეგიაში საკრებულოებიდან წევრები არ დანიშნა, მათთვის განსაზღვრული 55 ადგილი მმართველმა გუნდმა შეავსო, რის გამოც საარჩევნო კოლეგიაში „ქართულ ოცნებას“ 211 წევრი ჰყავს, საიდანაც 89 წევრი პარლამენტიდან არის, 13 წევრი – აჭარის უმაღლესი საბჭოდან, ხოლო 109 წევრი – საკრებულოებიდან.
პარლამენტი პრეზიდენტის არაპირდაპირი წესით არჩევას ცესკო-ს საშუალებით უზრუნველყოფს. პრეზიდენტის არჩევნების შედეგებს ცესკო არჩევნების დასრულებისთანავე, თავის სხდომაზე შეაჯამებს, რომელიც არჩევნების მსგავსად პარლამენტის სასახლეში გაიმართება.
