პენიტენციური სამსახურის პენიტენციური დეპარტამენტის დირექტორის ყოფილ მოადგილეს გიორგი ქემოკლიძეს, რომელსაც ბრალი გიორგი ბაჩიაშვილის საკანში მომხდარ ინციდენტთან დაკავშირებით წარედგინა, აღკვეთის ღონისძიების სახით პატიმრობა შეეფარდა.
გამოძიების ინფორმაციით, გიორგი ქემოკლიძემ გიორგი ბაჩიაშვილის საკანში პატიმრები ორჯერ შეასახლა. ცემის იმიტაცია წარმატებული მეორე მცდელობაზე აღმოჩნდა. მისი მითითებით ორჯერ გაითიშა სამეთვალყურეო კამერებიც.
ბაჩიაშვილის ცემის შესახებ ინფორმაცია, რამდენიმე თვის წინ გავრცელდა მსჯავრდებულის წერილთან ერთად, სადაც ის ირწმუნებოდა, რომ მისი ფიზიკური ანგარიშსწორება ივანიშვილისთვის მოპარული ბიტკოინების დასაბრუნებლად დაიგეგმა. საკანში მომხდარ ინციდენტთან დაკავშირებით გამოძიება თავიდან იუსტიციის სამინისტროს გენინსპექციამ დაიწყო. სპეციალური პენიტენციური სამსახურის მიერ, დღეს გავრცელებულ განცხადებაში ვკითხულობთ, რომ უსაფრთხოების სამსახურის ინფორმაცია თანხვედრაშია იმ ვერსიასთან, რომელზეც იუსტიციის სამინისტრო ჯერ კიდევ აგვისტოში საუბრობდა. საქმე მოგვიანებით სუს-ის ანტიკორუფციულ სააგენტოს გადაეცა, რადგან გამოძიების მიხედვით, ბაჩიაშვილი ქემოკლიძესთან სავარაუდოდ, სწორედ კორუფციულ გარიგებაში შევიდა.
გიორგი ქემოკლიძე პენიტენციური დეპარტამენტის დირექტორის მოადგილის თანამდებობიდან აგვისტოში გაათავისუფლეს, მას შემდეგ, რაც ბაჩიაშვილმა საკანში ცემის შესახებ ინფორმაცია გაავრცელა. რამდენიმე თვეში სუს-მა ქემოკლიძე სისხლის სამართლის კოდექსის, 332-ე მუხლით დააკავა.
