ვისაც სურს არჩევნებში მონაწილეობა, შეუძლიათ, მიმართონ პრეზიდენტს და მიიღონ შეწყალება, - განაცხადა გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ მსჯავრდებული პოლიტიკოსების მიმართ პრეზიდენტ მიხეილ ყაველაშვილის შეთავაზებაზე საუბრისას.
"ფაქტობრივად, პრეზიდენტის განცხადება წერტილს უსვამს იმ სპეკულაციებს, რომლებიც შეიძლება მოდიოდეს როგორც გარე აქტორების მხრიდან, ასევე ჩვენი რადიკალური ოპოზიციის ერთ-ერთ საყვირალ თემას წარმოადგენდეს. ვისაც სურს არჩევნებში მონაწილეობა, შეუძლიათ, მიმართონ პრეზიდენტს და მიიღონ შეწყალება. ამით შევძლებთ, ყველას კარგად დავანახოთ, რომ „ქართული ოცნების“ მოტივაცია არ იყო, რომ ეს ადამიანები ციხეში ყოფილიყვნენ. ყველამ კარგად კიდევ ერთხელ დაინახოს, რომ ისინი რომ დღეს ციხეში არიან რამდენიმე თვით, გამოწვეულია მათ მიერ დემონსტრაციულად კანონის დარღვევით იმისთვის, რომ ციხეში ჩამჯდარიყვნენ და ახალი პოლიტიკური დღის წესრიგი შეექმნათ“, - განაცხადა მაია ბითაძემ.
შეგახსენებთ, საქართველოს პრეზიდენტმა მიხეილ ყაველაშვილმა განცხადება გაავრცელა, სადაც ნათქვამია:
"ვთავაზობ ყველა შესაბამის მსჯავრდებულ პოლიტიკოსს, მომმართოს განცხადებით შეწყალების შესახებ და იმავე განცხადებით დაადასტუროს საკუთარი სურვილი არჩევნებში მონაწილეობის შესახებ. ამგვარი განცხადებით მომართვის შემთხვევაში, დაუყოვნებლივ გამოვცემ აქტს შესაბამისი მსჯავრდებულების შეწყალების თაობაზე."
მუნიციპალიტეტის წარმომადგენლობითი ორგანოს - საკრებულოს და თვითმმართველი ქალაქის/თვითმმართველი თემის მერის მორიგი არჩევნები ტარდება 2025 წლის 4 ოქტომბერს - ოქტომბრის პირველ შაბათს. - ცესკო პარტიებს მუნიციპალიტეტის ორგანოთა არჩევნებში მონაწილეობის უფლების და რიგითი ნომრის მისაღებ პროცედურებს კიდევ ერთხელ შეახსენებს
