ჩვენ უნგრელ ხალხს ვგულშემატკივრობდით, ვიქტორ ორბანის მარცხს ვგულშემატკივრობდით და ახლა პეტერ მადიარის გადაწყვეტილებებს შეაფასებს უნგრელი ხალხი, – ამის შესახებ „ნაციონალური მოძრაობის“ წევრმა, ლაშა ფარულავამ განაცხადა, რითაც უპასუხა მედიის კითხვას იმასთან დაკავშირებით, რომ ოპოზიცია არჩევნებში პეტერ მადიარს გულშემატკივრობდა, დღეს კი, მადიარის ინიციატივით, ევროკავშირის სამიტის დასკვნითი დეკლარაციიდან ამოღებულია პუნქტი უკრაინის გაწევრიანების დაჩქარების შესახებ.
მისი თქმით, უკრაინა იმსახურებს ევროპულ პერსპექტივას, ევროპის კავშირის წევრობას და იქნება არა მხოლოდ წევრი, არამედ – მთავარი ფლაგმანი ევროკავშირში.
„ჩვენ ვგულშემატკივრობდით უნგრელ ხალხს, რომელსაც სურდა ორბანის დამარცხება. ორბანი იყო მთავარი პარტნიორი, პოლიტიკური მამა ივანიშვილის, ის ლობირებდა, რომ თარგეთირებული სანქციები არ ყოფილიყო „ოცნების“ მაღალი თანამდებობის პირების მიმართ, აფერხებდა ყველა იმ გადაწყვეტილებას, რომელიც სჭირდება ჩვენს ხალხს და ქვეყანას. ამიტომ, ჩვენ უნგრელ ხალხს, ორბანის მარცხს ვგულშემატკივრობდით. პეტერ მადიარის გადაწყვეტილებებს კი, შეაფასებს უნგრელი ხალხი. დამიჯერეთ, მადიარის გადაწყვეტილებებს უკეთესად შეაფასებს უნგრელი ხალხი. უკრაინა იმსახურებს ევროპულ პერსპექტივას, ევროპის კავშირის წევრობას და ასეც იქნება. უკრაინა არის ევროპული უსაფრთხოების მთავარი ხაზი, იცავს ევროპის უსაფრთხოებას და არა მხოლოდ წევრი, მთავარი ფლაგმანი იქნება ევროკავშირში“, – განაცხადა ლაშა ფარულავამ.
