ირაკლი კობახიძე: "ჩვენ მიმართ იყო კონკრეტული ინტერესი, მეორე ფრონტის გახსნა, იგივე ინტერესი არ იყო მოლდოვის მიმართ, მათ შორის ერთი მარტივი მიზეზის გამო, რომ მოლდოვას არ ჰყავს ჯარი"

 "ბიუჯეტებს შორის სხვაობა რომ წარმოიდგინით, დაახლოებით 13 მლრდ-ით გაიზარდა საქართველოსა და მოლდოვას შორის. ხომ არის წარმოუდგენელი განსხვავება ეკონომიკური ზრდის ტენდენციებს შორის? მოლდოვაში ეკონომიკური ზრდის დაბალი ტემპი, მათ შორის იმის გამოძახილიც არის, რომ მას არ აქვს დემოკრატია, ადამიანის უფლებები არის უკიდურესად სუსტად დაცული, სახელმწიფო ინსტიტუტები არის უკიდურესად სუსტი, მაგრამ, მაინც, მოლდოვასთან დაკავშირებით არავის შენიშვნები არ აქვს, მათ შორის, არავის აქვს შენიშვნები, რომ მოლდოვა რჩება დსთ-ის წევრ ქვეყნად. მოლდოვა არ შეუერთდა არაერთ რეზოლუციას რუსეთის წინააღმდეგ, რომელსაც საქართველო შეუერთდა. ამაზე კითხვები არავის აქვს.

გახსოვთ, როგორი ყალბი რიტორიკა წარმოებდა საქართველოს წინააღმდეგ იმავე საკითხთან დაკავშირებით. აშკარაა ორმაგი სტანდარტი და ამ ორმაგ სტანდარტს აქვს ზუსტად ის საფუძველი, რაზედაც ვსაუბრობდი დღევანდელ ბრიფინგზე. ჩვენ მიმართ იყო კონკრეტული ინტერესი, მეორე ფრონტის გახსნა, იგივე ინტერესი არ იყო მოლდოვის მიმართ, მათ შორის ერთი მარტივი მიზეზის გამო, რომ მოლდოვას არ ჰყავს ჯარი. რეალურად, ჯარი რასაც ჰქვია, მოლდოვას არ ჰყავს, შესაბამისად, იქ მეორე ფრონტის გახსნას აზრიც არ აქვს. მოლდოვაში არ იყო ის ინტერესი, რაც იყო საქართველოს მიმართ. ამით აიხსნება ის ორმაგი სტანდარტი, რომელიც სრულიად თვალსაჩინოა. კიდევ ერთხელ გავიმეორებ, დსთ-ის წევრი არ უერთდებოდა რეზოლუციებს, არც მოლდოვამ დააწესა სანქციები, უსუსტესი ინსტიტუტები, კორუფცია ყვავის, უმძიმესი მდგომარეობაა დემოკრატიის, ადამიანის უფლებების კუთხით, თუმცა არავითარი შენიშვნები მოლდოვის მიმართ არაა. ეკონომიკას რაც შეეხება, არის რადიკალური სხვაობა ტენდენციებს შორის. გასაგებია, რაც არის ამ ყველაფრის ორმაგი სტანდარტის მიზეზი“, – განაცხადა ირაკლი კობახიძემ.