უნგრეთის მთავრობამ რუსეთის საელჩოს 10 თანამშრომელს ქვეყნის დატოვება მოსთხოვა. როგორც ქვეყნის საგარეო საქმეთა მინისტრმა განაცხადა, ეს პირები ისეთი ქმედებებით იყვნენ დაკავებული, რომელიც ვენის კონვენციით დიპლომატიურ სტატუსთან შეუთავსებელი და მიუღებელია.
რუსეთის ელჩი საგარეო უწყებაში დაიბარეს და გადაწყვეტილება ოფიციალურად აცნობეს. მინისტრის განცხადებით, ეს ნაბიჯი უნგრეთის ეროვნული უსაფრთხოებისა და სუვერენიტეტის დაცვას ისახავს მიზნად.
ბუდაპეშტში ხაზგასმით აღნიშნავენ, რომ დიპლომატების გაძევება არ ნიშნავს მოსკოვთან დიპლომატიური ურთიერთობების სრულად გაწყვეტას. უნგრეთი აცხადებს, რომ მზადაა, საჭიროების შემთხვევაში, დიალოგი ურთიერთპატივისცემისა და საერთაშორისო წესების საფუძველზე გააგრძელოს.
რუსეთის საგარეო საქმეთა სამინისტროში უკვე განაცხადეს, რომ ბუდაპეშტის ამ გადაწყვეტილებას "სათანადო პასუხი" გაეცემა.
