ძლიერმა წვიმამ და შტორმმა გამოიწვია წყალდიდობები და მეწყრები, რასაც ინდოეთში 56 ადამიანი ემსხვერპლა. ნეპალში 14 ადამიანი დაიღუპა და კიდევ 11 დაკარგულად ითვლება. ადგილობრივი ხელისუფლება კვირას მოსალოდნელი ხელახალი უეცარი წყალდიდობების შესახებ იუწყებოდა.
ინდოეთის ჩრდილოეთ შტატ უტარ-პრადეშში 25 სექტემბრიდან 27 სექტემბრის დილამდე 66.5 მმ ნალექი დაფიქსირდა, მაშინ როდესაც ამ პერიოდის ნორმა 7.6 მმ-ია, — განაცხადა შტატის საგანგებო სიტუაციების მართვის კომისარმა, ჰრიშიკეშ ბასკარ იაშოდმა.
ხელისუფლება ახორციელებს სამაშველო ოპერაციებს წყლით დაფარულ ტერიტორიებზე და არიგებს დახმარებას, ხოლო ოფიციალურ პირებს დაევალათ მოსავლის ზიანის შეფასება და კომპენსაციების გაცემა.
56 დაღუპულის გარდა, დაშავდა 46 ადამიანი, ხოლო 1 000-ზე მეტი სახლი დაზიანდა.
ნეპალის ხელისუფლებამ ქვეყნის 77 ოლქიდან 49-ში უეცარი წყალდიდობის საფრთხის შესახებ გააფრთხილა მოსახლეობა. მათგან ნახევარზე მეტში წყალდიდობის მაღალი რისკია, რადგან მთავარ მდინარეებსა და შენაკადებში წყლის დონე მატებას განაგრძობს.
ენერგეტიკის სამინისტროს ოფიციალური პირების ცნობით, ელექტრომომარაგება სრულად შეიზღუდა მანანგის, მუსტანგის, მიაგდისა და ბაგლუნგის ოლქებში, სადაც ხელისუფლება ელექტროენერგიის აღდგენაზე მუშაობს.
წყალრესურსებისა და ენერგეტიკის მინისტრმა ბირაჯ ბჰაქტა შრესთამ განაცხადა, რომ მდინარე რაჰუგანგას ადიდებამ დააზიანა 40-მეგავატიანი ჰიდროელექტროსადგურის ინფრასტრუქტურა და გადამცემი ხაზის ანძები.
ნეპალში მომხდარი კიდევ ერთი ინციდენტის დროს, ჩრდილოეთ მანანგის ოლქში, 7 126 მეტრი სიმაღლის ჰიმლუნგ ჰიმალის საბაზო ბანაკში ზვავის ჩამოწოლის შედეგად 10 ადგილობრივი მუშა დაკარგულად ითვლება. მუშები კარვებს დგამდნენ უცხოელი მთასვლელებისთვის, რომლებიც ზვავის ჩამოწოლის დროს ადგილზე არ იმყოფებოდნენ.
