პარტია "ერთიანი რუსეთი" რუსეთის ფედერაციის მე-9 მოწვევის სახელმწიფო დუმის არჩევნებში ხმების 57,87%-ს აგროვებს. ამის შესახებ რუსეთის ფედერაციის ცენტრალურმა საარჩევნო კომისიამ (ცესკო) ოქმების 87,9 პროცენტის დამუშავების შემდეგ განაცხადა.
მეორე ადგილზეა რუსეთის ფედერაციის კომუნისტური პარტია (კპრფ) 13,84%-ით, მესამეზე — ლდპრ (8,86%), მეოთხეზე — პარტია "ახალი ხალხი" (7,94%), ხოლო მეხუთეზე — "სამართლიანი რუსეთი" (4,95%). შესაბამისად, უკანასკნელი რისკის ქვეშაა, რომ ხუთპროცენტიანი ბარიერი ვერ გადალახოს. 2021 წელს "ერთიანმა რუსეთმა" სახელმწიფო დუმის არჩევნებში ხმების 49,82% მოიპოვა.
"ერთიანი რუსეთის" კანდიდატები ასევე ლიდერობენ 225-დან 208 ერთმანდატიან ოლქში. აქედან გამომდინარეობს, რომ მმართველი პარტია პარლამენტში მიიღებს 301-ზე მეტ ადგილს, რაც მას საკონსტიტუციო უმრავლესობისთვის ესაჭიროება.
ამჯერად რუსეთის პარლამენტის სამდღიანი არჩევნები უკრაინის რუსეთის მიერ ოკუპირებულ ტერიტორიებზეც იმართება. ერთადერთი მსხვილი პარტია, რომელიც ომის წინააღმდეგ გამოდიოდა — "იაბლოკო" — არჩევნებიდან მოხსნეს. გერმანიამ და ევროკავშირმა რუსეთის ფედერაციის საპარლამენტო არჩევნები გააკრიტიკეს და მიუთითეს მათ "დადგმულ ხასიათზე", აგრეთვე ოპოზიციის წინააღმდეგ განხორციელებულ რეპრესიებზე.
