აშშ-ის პრეზიდენტი დონალდ ტრამპი თავის რუს კოლეგასთან, ვლადიმერ პუტინთან სატელეფონო საუბარს აპირებს ირკუტსკის შავი ჭირის საწინააღმდეგო ინსტიტუტის 28 წლის ლაბორანტის, დარია შიპილოვას შესაძლო გარდაცვალების შესახებ გავრცელებული ცნობების ფონზე. "სახელმწიფო მეთაურებს უახლოეს დროში საუბარი აქვთ ჩანიშნული", - განაცხადა თეთრი სახლის ხელმძღვანელმა ჟურნალისტის კითხვაზე პასუხად, განიხილა თუ არა მან ირკუტსკში მომხდარი მოვლენები პუტინთან.
ჯანდაცვის მსოფლიო ორგანიზაცია კონტაქტს ინარჩუნებს რუსეთის ჯანდაცვის ორგანოებთან და მათ ტექნიკური მხარდაჭერა შესთავაზა, - განაცხადა ჯანმოს ხელმძღვანელმა ტედროს ადანომ გებრეიესუსმა X-ში. ამასთან ერთად, მან დაწერა, რომ ჯანმოს მოთხოვნის საპასუხოდ, რუსეთის ჯანდაცვის უწყებებმა განაცხადეს, რომ ბოლო დროს ირკუტსკის ოლქში შავი ჭირის არცერთი შემთხვევა არ დაფიქსირებულა.
"მათ ჯანმოს მიაწოდეს ინფორმაცია იმის შესახებ, რომ ჩატარდა ეპიდემიოლოგიური გამოკვლევა, მიღებულია პროფილაქტიკური და საკონტროლო ზომები, ხოლო გამოვლენილი კონტაქტები სამედიცინო დაკვირვების ქვეშ იმყოფებოდნენ და გაიარეს ტესტირება. მათ განაცხადეს, რომ კონტაქტებს შორის მაღალი საფრთხის შემცველი პათოგენები არ გამოვლენილა და რომ ყველა გამოვლენილ კონტაქტზე სამედიცინო დაკვირვება დასრულებულია", - განაგრძო ჯანმოს ხელმძღვანელმა.
იმავე პოსტში გებრეიესუსმა დაწერა, რომ ორგანიზაციამ "მოითხოვა დამატებითი ინფორმაცია მძიმე პნევმონიის გამომწვევი მიზეზისა და იმ გამომწვევის გასარკვევად, რომელიც საზოგადოებრივი ჯანდაცვის სფეროში ზომების მიღების საფუძველი გახდა, ასევე მასმედიის საშუალებების ცნობების გადასამოწმებლად მეორე თანამშრომლის შესახებ, რომელსაც დაუდგენელი მიზეზის პნევმონია აღენიშნება".
მანამდე, 5 ოქტომბერს, დონალდ ტრამპმა განაცხადა, რომ აშშ ძალიან ყურადღებით ადევნებს თვალს იმას, რაც ხდება რუსეთში. "ჩვენ ახლახან გავიგეთ ამის შესახებ და ისინი ამას პნევმონიას უწოდებენ. ადრე პნევმონიის მკურნალობა უფრო ადვილი იყო, მაგრამ მიკრობები და ბაქტერიები არაპროპორციულად უფრო ძლიერი გახდა. თუმცა ჩვენ მათ დავეხმარებით", - განაცხადა ტრამპმა ჟურნალისტის კითხვაზე პასუხად, მოახდენს თუ არა თეთრი სახლი რეაგირებას რუსეთიდან გავრცელებულ შესაბამის ცნობებზე.
ირკუტსკის ოლქის შელეხოვის რაიონულ საავადმყოფოში 2 ოქტომბრის ღამეს ირკუტსკის შავი ჭირის საწინააღმდეგო ინსტიტუტის 28 წლის ლაბორანტი დარია შიპილოვა გარდაიცვალა. მეზობელი ბურიატიის ხელმძღვანელი ალექსეი ციდენოვი წერდა, რომ მისი სიკვდილის მიზეზი შავი ჭირი გახდა. მოგვიანებით მან თავისი შეტყობინება დაარედაქტირა და მასში სიტყვა "შესაძლოა" დაამატა.
"როსპოტრებნადზორმა" განაცხადა, რომ გარდაცვლილს ფილტვების ანთება დაუდგინეს, რომლის მიზეზიც დადგენილი არ არის. ირკუტსკის ოლქის გუბერნატორი იგორ კობზევი იუწყებოდა ეჭვზე "განსაკუთრებით საშიშ ინფექციასთან" დაკავშირებით, თუმცა სავარაუდო დიაგნოზი არ დაუსახელებია.
