შვეიცარიამ რუსი მეწარმე მიხეილ ფრიდმანი და ბიზნესმენი ალიშერ უსმანოვი ამოიღო სანქციების სიიდან, რომლებიც უკრაინაში რუსეთის სამხედრო შეჭრის გამო დაწესდა. ამის შესახებ მონაცემები შვეიცარიის ეკონომიკურ საქმეთა სახელმწიფო სამდივნომ (SECO) გამოაქვეყნა.
ფრიდმანისა და უსმანოვის გარდა, შეზღუდვები გაუქმდა ყირიმის ვერნადსკის სახელობის ფედერალური უნივერსიტეტის ყოფილი რექტორის, ანდრეი ფალალეევისა და იურიდიული პირის, Redbird Corporate Services Ltd-ის მიმართ. კიდევ ორი ფიგურანტი — სახელმწიფო დუმის ყოფილი დეპუტატი იური შვიტკინი და კონსტრუქტორი ალექსანდრ ლეონოვი — სიიდან გარდაცვალების გამო ამოიღეს.
ამავდროულად, შვეიცარიის სანქციების სიას 254 პოზიცია დაემატა. SECO-ს ცნობით, მათ შორის არის 33 რუსული ბანკი, ერთი ფინანსური დაწესებულება მესამე ქვეყნიდან, ფინანსური სექტორისა და კრიპტოვალუტის მომსახურების მიმწოდებელი 17 ორგანიზაცია, ხუთი კომპანია მესამე ქვეყნებიდან, ასევე ოთხი აეროპორტი და ორი პორტი რუსეთში.
უწყებაში ასევე განაცხადეს, რომ საგარეო პოლიტიკური და იურიდიული ფაქტორების განხილვის შემდეგ, ხელისუფლებამ ჯერჯერობით გადაწყვიტა, არ დააწესოს შეზღუდვები რუსეთის ორ მოქალაქეზე. იმავე მიზეზების გამო, გაძლიერებული საექსპორტო კონტროლი არ გავრცელდა მესამე ქვეყნებში რეგისტრირებულ 14 კომპანიაზე.
ამასთან, SECO-ში ხაზგასმით აღნიშნეს, რომ სანქციების მე-20 პაკეტის ფარგლებში უკვე მიღებული ოპერატიული ზომები ხელს უნდა უშლიდეს სავაჭრო შეზღუდვების გვერდის ავლას.
