ევროკავშირმა დააჩქარა ძალისხმევა უკრაინის დასახმარებლად გაყინული რუსული აქტივების გამოყენების სქემაზე შეთანხმების მისაღწევად მას შემდეგ, რაც გასულ კვირაში გავრცელებულ აშშ-ს მიერ მხარდაჭერილ სამშვიდობო გეგმაში განსხვავებული იდეები იყო წარმოდგენილი. ამის შესახებ Reuters-ს ევროკავშირის ოფიციალურმა პირმა უთხრა.
ევროკავშირი გაყინული რუსული აქტივების (140 მილიარდი ევრო) კიევისთვის სესხის სახით გადაცემაზე შეთანხმებას გასულ თვეშიც ცდილობდა, თუმცა, მაშინ ინიციატივას მხარი არ დაუჭირა ბელგიამ, სადაც ამ აქტივების დიდი ნაწილი ინახება.
ამჟამად, ევროკომისია იმედოვნებს, რომ ბელგიის წუხილებს ახალი საკანონმდებლო წინადადების პროექტში უპასუხებს, რომელსაც ამ კვირაში წარადგენს. ევროკავშირში მომუშავე ოფიციალური პირის თქმით, საკანონმდებლო წინადადება რუსული აქტივების უკრაინის დასახმარებლად 2026 და 2027 წლებში გამოყენებას ეხება.
როგორც Reuters აღნიშნავს, ევროკავშირში გეგმაზე მუშაობა უკვე მიმდინარეობდა, თუმცა, გასულ კვირაში გამოქვეყნებულმა ინფორმაციამ, თუ როგორ შეიძლება გამოიყენონ გაყინული აქტივები აშშ-ს მხარდაჭერილი გეგმის ფარგლებში, ბლოკი დააჩქარა.
"ამან ამ საკითხზე მუშაობა, რა თქმა უნდა, კიდევ უფრო საჩქაროდ აქცია". - უთხრა ევროკავშირში მომუშავე საკითხის მცოდნე ოფიციალურმა პირმა გამოცემას.
ევროკავშირის გეგმის თანახმად, რუსეთის გაყინული აქტივები უკრაინას სესხად გადაეცემა, რათა კიევმა თავდაცვისა და რეგულარული ბიუჯეტის საჭიროებებისთვის გამოიყენოს.
