თურქეთის პრეზიდენტმა რეჯეფ თაიფ ერდოღანმა მკაცრად უარყო თურქეთის ისტორიასთან დაკავშირებული ბრალდებები და განაცხადა, რომ ქვეყნის წარსულში არასდროს ყოფილა გენოციდის ან კოლონიალიზმის შემთხვევები.
თავის გამოსვლაში ერდოღანმა ხაზი გაუსვა, რომ თურქეთის ისტორია ეფუძნება სამართლიანობასა და ჰუმანიზმს. მისი თქმით, თურქეთი ყოველთვის იყო ქვეყანა, რომელიც იცავდა დაჩაგრულებს და ხელს უწყობდა მშვიდობას რეგიონში.
პრეზიდენტმა განაცხადა, რომ თურქი ხალხის კულტურასა და რწმენაში არ არის ადგილი გენოციდისთვის. მისი თქმით, ამგვარი ბრალდებები პოლიტიკური მოტივებით არის ნაკარნახევი და არ ეფუძნება ისტორიულ სიმართლეს.
ერდოღანმა ასევე აღნიშნა, რომ თურქეთი არასდროს ყოფილა კოლონიზატორი ძალა. პირიქით, მისი თქმით, ოსმალეთის იმპერიის დროს მმართველობა ეფუძნებოდა მრავალფეროვნებისა და თანაცხოვრების პრინციპებს.
თურქეთის ლიდერმა მოუწოდა საერთაშორისო საზოგადოებას, თავი შეიკავონ ისტორიის დამახინჯებისგან და მეტი ყურადღება მიაქციონ თურქეთის კონსტრუქციულ როლს თანამედროვე გლობალურ პოლიტიკაში.
ერდოღანმა გამოსვლისას დასძინა, რომ თურქეთი მზად არის, ნებისმიერ ისტორიულ კვლევაში მიიღოს მონაწილეობა, რათა დაამტკიცოს საკუთარი სიმართლე და გაფანტოს არსებული მითები.
