გამოცემა Politico-სთან საუბრისას ევროკავშირის ერთ-ერთმა დიპლომატმა განაცხადა, რომ ევროკავშირი ჩინეთის დასანქცირებას აპირებს უკრაინის წინააღმდეგ მიმდინარე ომში რუსეთის მხარდაჭერის გამო.
Politico-ს ცნობით, ევროკავშირმა ეს გადაწყვეტილება ივლისში Reuters-ის მიერ გავრცელებული ინფორმაციის შემდეგ მიიღო, რომლიდანაც გაირკვა, რომ რუსეთმა დრონებისთვის ფარულად ჩინური ძრავის ნაწილები მოიპოვა.
Reuters-ის ექსკლუზიური ინფორმაციით, რუსეთის სახელმწიფო მფლობელობაში არსებულ დრონების მწარმოებელ კომპანიას ჩინეთში დამზადებული ძრავის ნაწილები ფიქციური კომპანიების გავლით ფარულად მოეწოდა.
წყაროებისა და დოკუმენტის მიხედვით, ამ ნაწილების მიწოდებით რუსული იარაღის მწარმოებელი კომპანია IEMZ Kupol-ისთვის შესაძლებელი გახდა, Гарпия-A1-ის ტიპის მოიერიშე დრონის წარმოება გაზრდილიყო მიუხედავად იმისა, რომ ოქტომბერში აშშ-მ და ევროკავშირმა სანქციები დააწესეს, რომლის მიზანიც მიწოდების ჯაჭვის შეფერხება იყო.
Politico-ს მიხედვით, გავრცელებულმა ინფორმაციამ ბრიუსელში განგაში გამოიწვია, რის შემდეგაც ევროკავშირის 15 წევრი ქვეყანა რუსეთისთვის ძრავის ნაწილების მიწოდების შესახებ ჩინეთს დაუკავშირდა, თუმცა ჩინეთმა ან უარყო ჩართულობა ან მათთვის პასუხი არ გაუცია.
"ცნობა ზუსტია და აჩვენებს, რომ ჩინეთი როლს აფართოებს, როგორც რაოდენობრივად, ისე თვისებრივად. სამართლიანია იმის თქმა, რომ ჩინეთის მხარდაჭერის გარეშე ომი ახლა ძალზე სხვანაირი იქნებოდა." - განაცხადა ევროპელმა დიპლომატმა.
მან ასევე აღნიშნა, რომ მედიაში ცნობების გავრცელებამდე ევროკავშირში დრონების მიწოდების შესახებ იცოდნენ. "აგვისტოს მერე ჩვენ სანქციებს მოვითხოვთ," თქვა დიპლომატმა და დაამატა, რომ ევროკავშირმა საკუთარი ეკონომიკური ბერკეტის შესაძლებლობები სათანადოდ უნდა შეაფასოს: "ჩვენ დიალოგი გვსურს, მაგრამ ასევე - მოქმედებაც." - დაამატა მან.
