ჩრდილოატლანტიკური ალიანსის ისტორიაში პირველად, ისლანდიის სანაპიროებთან გამართული ყოველწლიური ფართომასშტაბიანი სამხედრო წვრთნები — Northern Viking — ამერიკული ხომალდებისა და თვითმფრინავების მონაწილეობის გარეშე ჩატარდა. ამის შესახებ გამოცემა Politico იტყობინება.
მანევრები სტრატეგიულად მნიშვნელოვან GIUK-ის ზონაში (გრენლანდია, ისლანდია, გაერთიანებული სამეფო) გაიმართა. წვრთნების მთავარ ამოცანას ჩრდილოეთ ატლანტიკაში რუსული ატომური წყალქვეშა ნავების ძებნა და მათ წინააღმდეგ მოქმედება წარმოადგენდა.
აშშ-ის არყოფნის ფონზე, ოპერაციას სათავეში ფრანგი მეთაური ჩაუდგა. წვრთნებში მონაწილეობდნენ კანადური სამხედრო ხომალდები, გერმანული სადაზვერვო თვითმფრინავები და ბელგიური გამანადგურებლები.
როგორც ექსპერტები აღნიშნავენ, აშშ-ის სამხედრო ძალების ნაწილის ახლო აღმოსავლეთსა და კარიბის ზღვის აუზში კონცენტრირებამ, ისევე როგორც ვაშინგტონის როლის ცვლილებამ, NATO-ს ევროპელ წევრებს აჩვენა, რომ მათ ჩრდილოეთ ატლანტიკის უსაფრთხოების დამოუკიდებლად დაცვა და ამერიკული ლიდერობის გარეშე მოქმედება შეუძლიათ.
მიუხედავად იმისა, რომ ამერიკელმა სამხედროებმა ისლანდიის აეროპორტში ინფრასტრუქტურის განვითარებაში მონაწილეობა მიიღეს, თვით წვრთნებში აშშ-ის საზღვაო და საჰაერო ძალების არყოფნა NATO-ში ახალ ტენდენციას უსვამს ხაზს.
