აშშ-ის კონგრესში განსახილველად წარადგენენ ორპარტიულ კანონპროექტს, რომელიც "რუსული ნავთობის ნებისმიერი შესყიდვის აკრძალვისკენაა მიმართული". ამის შესახებ X-ზე წარმომადგენელთა პალატის წევრმა ბრაიან ფიცპატრიკმა (რესპუბლიკელი პენსილვანიის შტატიდან) განაცხადა.
მისი თქმით, დოკუმენტს ეწოდება "რონალდ რეიგანის კანონი: მშვიდობა ძალის მეშვეობით".
კანონპროექტი პლენარულ სხდომაზე განსახილველად discharge petition-ის (საპარლამენტო პროცედურა) ფარგლებში გამოიტანება. აღნიშნული პროცედურა რიგით კანონმდებლებს საშუალებას აძლევს, პროექტი მთლიანი პალატის კენჭისყრაზე პროფილური კომიტეტისა თუ სპიკერის გვერდის ავლით გამოიტანონ, რომლებიც განხილვას ბლოკავენ. ამასთან, საჭიროა სულ მცირე 218 კანონმდებლის — ანუ აბსოლუტური უმრავლესობის — ხელმოწერის მოპოვება. "ის ხმათა უმრავლესობით იქნება მიღებული", — მიაჩნია ფიცპატრიკს.
წარმომადგენელთა პალატის წევრმა დონ ბეიკონმა (რესპუბლიკელი ნებრასკის შტატიდან) უკვე აღნიშნა, რომ მხარს დაუჭერს დოკუმენტს და გააკრიტიკა აშშ-ის პრეზიდენტის, დონალდ ტრამპის გადაწყვეტილება რუსეთისგან დიზელის საწვავის შესყიდვის შესახებ.
მანამდე, 9 ოქტომბერს, თეთრი სახლის ხელმძღვანელმა რუსეთის პრეზიდენტ ვლადიმერ პუტინთან "ძალიან წარმატებული" მოლაპარაკებების შესახებ განაცხადა, რომლის დროსაც აშშ-სა და მსოფლიო ბაზარზე რუსული დიზელის მიწოდებაზე შეთანხმებას მიაღწიეს.
პუტინმა ოფიციალურად დაადასტურა ტრამპთან სატელეფონო საუბარი და მიღწეული შეთანხმებები. "მსოფლიო ენერგეტიკაში არსებული ვითარების განხილვისას, რუსულმა მხარემ დაადასტურა მზადყოფნა, მიაწოდოს ნავთობი და ნავთობპროდუქტები ამერიკულ და მსოფლიო ბაზრებს. დარწმუნებული ვარ, ეს დადებითად აისახება მთლიან გლობალურ ეკონომიკაზე", — ნათქვამი იყო რუსეთის პრეზიდენტის განცხადებაში.
