ევროკავშირი წელს 20 მილიონ ევროს გამოყოფს მოლდოვის საჰაერო თავდაცვის გასაძლიერებლად. ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში კაია კალასმა X-ზე დაწერა.
კალასის სიტყვებით, ევროკავშირის ეს გადაწყვეტილება გამოწვეულია რუსული უპილოტო საფრენი აპარატების მიერ მოლდოვას საჰაერო სივრცის დარღვევით.
"რუსული დრონების მიერ მოლდოვის საჰაერო სივრცის დარღვევა მიუღებელია და საფრთხეს უქმნის სამოქალაქო საჰაერო მიმოსვლას. ევროკავშირი წელს მოლდოვის საჰაერო თავდაცვისთვის 20 მილიონ ევროს გამოყოფს, რათა ხელი შეუწყოს ქვეყნის უსაფრთხოების გაძლიერებას. მოლდოვის ცა არ შეიძლება გახდეს რუსეთის ომის მსხვერპლი", - წერს კალასი X-ზე.
