ირლანდიამ ევროკავშირის 2028-2034 წლების ბიუჯეტის 140 მილიარდი ევროთი შემცირება შესთავაზა

ამრიგად, ევროკომისიის მიერ მანამდე შეთავაზებული 1,985 ტრილიონი ევროს მოცულობის გრძელვადიანი ბიუჯეტის რვა პროცენტით შემცირება იგეგმება. თუმცა, საზოგადოების 27 წევრი სახელმწიფოს მოსაზრებები შემდეგი ბიუჯეტის მოცულობის შესახებ გაიყო და ნაკლებად სავარაუდოა, რომ ახალი კონცეფცია მოლაპარაკებებში სწრაფ გარღვევას შეუწყობს ხელს, აღნიშნავს dpa.

კერძოდ, გერმანია და ევროკავშირის სხვა მსხვილი დონორები, როგორებიცაა ნიდერლანდები, შვედეთი და ავსტრია, ბიუჯეტის პროექტის რამდენიმე ასეული მილიარდი ევროთი შემცირებას ითხოვენ. ამავდროულად, რიგი ქვეყნები, მათ შორის საფრანგეთი, ესპანეთი და პოლონეთი, ბიუჯეტის გაზრდის მომხრეა.

dpa-ს ინფორმაციით, ირლანდიამ წამოაყენა წინადადება, მნიშვნელოვნად შემცირდეს ხარჯები იმ სფეროებში, რომლებზეც ევროკომისია თავდაპირველად მეტი სახსრების გამოყოფას გეგმავდა: კონკურენტუნარიანობა, სამეცნიერო კვლევები, თავდაცვა, ასევე საგარეო და განვითარების პოლიტიკა. ამავდროულად, ტრადიციული მსხვილი ხარჯვითი მუხლები — აგრარული პოლიტიკა და თანხვედრის პოლიტიკა — პრაქტიკულად ხელუხლებელი დარჩა.

ამასთან, AFP-ს მონაცემებით, ირლანდია სთავაზობს საერთაშორისო დახმარებაზე ხარჯების 17 პროცენტით, ადმინისტრაციული ხარჯების — 12 პროცენტით, ხოლო კონკურენტუნარიანობის ახალი ფონდის დაფინანსების დაახლოებით 13 პროცენტით შემცირებას. ამავდროულად, ირლანდიის შეფასებით, სამპროცენტიანი შემცირება შეიძლება, შეეხოს ისეთ ტრადიციულ სფეროებსაც, როგორიცაა სოფლის მეურნეობა და რეგიონული განვითარების ფონდები.

ევროკავშირის ერთ-ერთმა დიპლომატმა dpa-სთან საუბარში ირლანდიის წინადადებას იმედგაცრუება უწოდა და აღნიშნა, რომ ის შორიდანაც კი ვერ გამოდგება შეთანხმების საფუძვლად, რადგან მასში გათვალისწინებული ხარჯების მნიშვნელოვანი ზრდა ბიუჯეტისთვის აუტანელია. გარდა ამისა, სააგენტოს თანამოსაუბრის თქმით, ეს პროექტი პრიორიტეტს მე-20 საუკუნის პოლიტიკურ ამოცანებს ანიჭებს და არ უზრუნველყოფს ევროკავშირის მომზადებას 21-ე საუკუნის გამოწვევებისთვის.

შემდეგი გრძელვადიანი ბიუჯეტის პროექტი მომავალ კვირას, ევროკავშირის სამიტზე განიხილება. ევროკავშირის გრძელვადიანი საბიუჯეტო გეგმის შესახებ შეთანხმება წლის ბოლომდე უნდა იქნეს მიღწეული. ევროკავშირის ბიუჯეტი ძირითადად, წევრი სახელმწიფოების მთლიანი ეროვნული შემოსავლიდან შენატანებით ფორმირდება. გერმანიას, რომელსაც ევროკავშირში უდიდესი ეკონომიკა აქვს, ყველაზე მნიშვნელოვანი წვლილი შეაქვს — დანარჩენი ქვეყნებისგან უზარმაზარი სხვაობით.