ილონ მასკის კომპანია X-ის ფრანგულ ოფისებში სამართალდამცველები ჩხრეკას ატარებენ. პროკურატურის კიბერდანაშაულის წინააღმდეგ ბრძოლის განყოფილება ჩხრეკებს ევროპოლისა და საფრანგეთის პოლიციის კიბერდანაშაულის წინააღმდეგ ბრძოლის დეპარტამენტის მხარდაჭერით ატარებს.
გავრცელებული ცნობით, ჩხრეკა 2025 წლის იანვარში დაწყებულ გამოძიებას უკავშირდება.
ილონ მასკი და X-ის ყოფილი აღმასრულებელი დირექტორი ლინდა იაკარინო, გამოძიების ფარგლებში, 20 აპრილს დაგეგმილ მოსმენაზე დაიბარეს.
გამოძიება მას შემდეგ დაიწყო, რაც პარტია "რენესანსის" ლიბერალმა კანონმდებელმა, ერიკ ბოთორელმა X-ზე ალგორითმული მიკერძოების და მის მენეჯმენტში სავარაუდო ჩარევის შესახებ შეშფოთება გამოთქვა.
ცალკე საჩივარი შეიტანა საჯარო სამსახურის კიბერუსაფრთხოების დირექტორმა, რომელმაც განაცხადა, რომ X-ის ალგორითმში ცვლილებებმა გააძლიერა "არასასიამოვნო პოლიტიკური შინაარსი".
პროკურატურის ინფორმაციით, ორმა პირმა განაცხადა, რომ, სავარაუდოდ, X-ის ალგორითმი გამოიყენეს "უცხოური ჩარევის მიზნებისთვის".
