NATO-ს წევრმა ქვეყნებმა უნდა შეამცირონ, ან უარი თქვან რუსეთში სამხედრო ობიექტებზე თავდასხმისთვის დასავლური იარაღის გამოყენებაზე დაწესებულ შეზღუდვებზე, – განაცხადა ალიანსის გენერალურმა მდივანმა იენს სტოლტენბერგმა ბრიუსელში უკრაინა-NATO-ს საბჭოს სხდომამდე.
"ჩვენ უნდა გავიგოთ, რა არის ომი და აგრესია. რუსეთი უკრაინას საერთაშორისო სამართლის დარღვევით უტევს. და, საერთაშორისო სამართლის მიხედვით, უკრაინას თავდაცვის უფლება აქვს, მათ შორის, აგრესორის სამხედრო ობიექტებზე - რუსეთის ტერიტორიაზე თავდასხმის", - აღნიშნა სტოლტენბერგმა.
მან ხაზგასმით აღნიშნა, რომ უკრაინის თავდაცვის უფლება არ არის ესკალაცია და ეს NATO-ს არ აქცევს კონფლიქტის ნაწილად.
სტოლტენბერგმა აღნიშნა, რომ რუსეთმა გახსნა ახალი ფრონტი ჩრდილოეთ უკრაინაში, რადგან მას შეუძლია, დაუსჯელად განახორციელოს საარტილერიო დარტყმები საკუთარი ტერიტორიიდან.
"სანამ რუსული საარტილერიო სისტემები შეუფერხებლად მოქმედებენ რუსეთის ტერიტორიაზე საზღვრის გასწვრივ, უკრაინელებს ძალიან გაუჭირდებათ თავის დაცვა", - თქვა NATO-ს გენმდივანმა.
სტოლტენბერგმა აღნიშნა, რომ NATO-ს მოკავშირეები აგრძელებენ უკრაინელი მფრინავების და ტექნიკური პერსონალის წვრთნას F-16-ის უკრაინული გამოყენებისთვის, მაგრამ არ დაუსახელებია ვადები, როდის მოხერხდება მებრძოლების უსაფრთხოდ ოპერირება უკრაინაში.
