სწრაფი კვების რესტორნების ქსელის ოპერატორმა განვლილ შაბათ-კვირას აღიარა კლიენტისთვის შეთავაზებულ წვნიანში ვირთხის და ტარაკნის აღმოჩენა და 31 მარტიდან 4 აპრილის ჩათვლით გენერალური დასუფთავებისთვის 2000-ზე მეტი ობიექტის დახურვის შესახებ განაცხადა.
განცხადებაში სწრაფი კვების რესტორნების ქსელის ოპერატორმა Sukiya-მ ბოდიში მოუხადა კლიენტებს, დაარწმუნა ისინი, რომ სერიოზულად უყურებენ შექმნილ სიტუაციას და აღნიშნა, რომ კერძების მავნებლებით და პარაზიტებით დაბინძურების მიზეზების აღმოსაფხვრელად დროებით ხურავს ობიექტების აბსოლუტურ უმრავლესობას.
საქონლის ხორცის და ბრინჯის კერძებით ცნობილ რესტორნების ქსელის ობიექტში კლიენტის მიერ წვნიანში ვირთხის აღმოჩენის შესახებ ხმები იანვრიდან მოყოლებული რამდენიმე კვირის განმავლობაში მანამ ვრცელდებოდა, სანამ Sukiya -მ არ აღიარა, რომ კლიენტმა ჭამის დაწყებამდე წვნიანში ვირთხა აღმოაჩინა და შენობის ბზარების შეკეთების მიზნით დროებით არ დახურა რესტორანი.
კომპანიამ აგრეთვე განაცხადა, რომ ყველა განყოფილება რეგულარულად შემოწმდებოდა ხარვეზებზე და ნარჩენები შეინახებოდა მაცივარში.
კომპანია იძულებული გახდა უფრო რადიკალური ნაბიჯები გადაედგა და თითქმის ყველა თავის ობიქტი, გამოკლებით მაღაზიებისა, დაეხურა მას შემდეგ, რაც გასულ პარასკევს კლიენტმა საჭმელში ტარაკანა იპოვა. გავრცელებული განცხადების თანახმად, ობიექტის მენეჯერმა კლიენტს ბოდიში მოუხადა და ფული უკან დაუბრუნა.
ობიექტების დახურვის შესახებ ცნობის გავრცელების შემდეგ კომპანიის აქციების ფასი დაეცა, თუმცა შემდეგ თანდათან მიუახლოვდა წინანდელ ნიშნულს.
