მასობრივი არეულობა, რომელმაც გასულ შაბათ-კვირას საფრანგეთი მოიცვა, შესაძლოა, სადაზღვევო კომპანიებს 1.2 მლრდ ევრომდე დაუჯდეთ, რაც მას ქვეყნის ისტორიაში საპროტესტო აქციებთან დაკავშირებულ ერთ-ერთ უმსხვილეს სადაზღვევო შემთხვევად აქცევს. ამის შესახებ გამოცემა Financial Times (FT) Morningstar DBRS-ის ანალიტიკოსებზე დაყრდნობით იტყობინება.
FT-ის მიერ გამოკითხული სადაზღვევო ბროკერები ასევე ვარაუდობენ, რომ ზარალი 1 მლრდ ევროს გადააჭარბებს. მიუხედავად იმისა, რომ ორშაბათ საღამოს ქუჩებში მდგომარეობა უფრო მშვიდი იყო, არეულობის გაგრძელების შემთხვევაში ზარალი, შესაძლოა, გაიზარდოს.
Morningstar DBRS-ის ანალიტიკოსმა, მარკოს ალვარესმა საფრანგეთში მასობრივი არეულობები სტიქიურ უბედურებებს შეადარა. მისი თქმით, მსგავსი მოვლენები, რომლებიც ასობით მილიონი ევროს ზარალს იწვევს, ქვეყანაში ახლა უკვე ყოველწლიურად შეიძლება მოხდეს.
გასული შაბათ-კვირის არეულობების სავარაუდო დანაკარგები უკვე აჭარბებს 2023 წლის ივლისის არეულობების ზარალს, რომელიც პოლიციელის ხელით მოზარდის დაღუპვის შემდეგ დაიწყო და ერთ კვირაზე მეტხანს გაგრძელდა. მაშინ, გაერთიანება France Assureurs-ის მონაცემებით, მზღვეველებმა 798 მილიონი ევრო გადაიხადეს.
ალვარესმა ზარალის ზრდა ამჟამინდელი არეულობების მასშტაბითა და ინტენსივობით, ასევე ინფლაციით ახსნა, რამაც დაზიანებული ქონების აღდგენის ხარჯები გაზარდა. საფრანგეთის ვაჭრობის მინისტრის, სერჟ პაპენის წინასწარი შეფასებით, არეულობებისგან, მთელი ქვეყნის მასშტაბით, არანაკლებ 3 ათასი საწარმო დაზარალდა. გაძარცვულ და დაზიანებულ მაღაზიებს შორის ლუქს-ბრენდების, Louis Vuitton-ისა და Kenzo-ს ბუტიკებიც აღმოჩნდა.
