აშშ-ის პრეზიდენტ დონალდ ტრამპის ადმინისტრაციამ ჩიხში შესული სამშვიდობო მოლაპარაკებების განახლების მცდელობის ფარგლებში, უკრაინაში სრულმასშტაბიანი შეჭრის შემდეგ, ევროპას გაყინული რუსეთის სახელმწიფო აქტივების ნაწილისთვის შეზღუდვების მოხსნა შესთავაზა. თუმცა, ევროპულმა ქვეყნებმა თეთრი სახლის წინადადება უარყვეს. ამის შესახებ ხუთშაბათს, 15 ოქტომბერს, გამოცემა Financial Times წყაროებზე დაყრდნობით წერს.
FT-ს რესპონდენტების ცნობით, აღნიშნული გეგმა აშშ-ის პრეზიდენტის სპეციალურმა წარმომადგენელმა სტივენ უიტკოფმა და ტრამპის სიძემ, ჯარედ კუშნერმა მაიამიში, უკრაინულ მხარესა და ევროპული ქვეყნების წარმომადგენლებთან გამართული შეხვედრისას წარადგინეს. ის ითვალისწინებდა გაყინული რუსული აქტივების ნაწილის გადარიცხვას სპეციალურ ფინანსურ სტრუქტურაში, რომელიც ვაშინგტონის კონტროლქვეშ იქნებოდა.
მაიამის შეხვედრაზე ევროპის წარმომადგენლები აშშ-ისთვის აქტივებზე კონტროლის გადაცემის ან რუსეთის გაყინული აქტივების ნებისმიერი ნაწილის დაბრუნების წინააღმდეგ გამოვიდნენ, განუცხადეს გამოცემის წყაროებმა. მათი თქმით, უიტკოფისა და კუშნერის წინადადებამ უკრაინელ ჩინოვნიკებსა და ევროპელ დიპლომატებში შეშფოთება გამოიწვია რუსეთზე ზეწოლის განხორციელების ვაშინგტონისეული მცდელობების გამო.
2022 წლის თებერვალში დასავლეთის მთავრობებმა დაახლოებით 260 მილიარდი ევროს ოდენობის რუსეთის სახელმწიფო აქტივები გაყინეს. მათი უდიდესი ნაწილი EU-ში იმყოფება.
EU-ს ეს სახსრები უკრაინისთვის ჯერ არ გადაუცია და მათგან მიღებულ შემოსავლებს კიევის ფინანსური მხარდაჭერისთვის იყენებს. კერძოდ, უკრაინამ G7-ის ქვეყნებისგან 45 მილიარდი ევროს ოდენობის სესხი მიიღო, რომელიც გაყინული აქტივებიდან მიღებული პროცენტული შემოსავლებით არის უზრუნველყოფილი, წერს FT.
EU-ს წევრი ქვეყნების ლიდერებმა პირობა დადეს, რომ ამ აქტივებს უკრაინის აღდგენის დაფინანსებისთვის გამოიყენებენ, თუ რუსეთი ომის დასრულების შემდეგ რეპარაციებს არ გადაიხდის.
როგორც FT-ს წყაროებმა გაუსვეს ხაზი, რუსული აქტივების განბლოკვისთვის EU-ს ასევე დასჭირდება ბლოკის ყველა წევრი ქვეყნის ერთსულოვანი თანხმობა, რაც უიტკოფისა და კუშნერის ინიციატივის წინ წაწევასა და რეალიზებას გაართულებს.
