ევროკომისიამ უკრაინას 2.86 მილიარდი ევრო გამოუყო დრონების, საჰაერო თავდაცვის სისტემების, რაკეტების, რადიოლოკაციური სადგურების, რადიოელექტრონული ბრძოლის სისტემებისა და საბრძოლო მასალის შესასყიდად. ამის შესახებ ოთხშაბათს, 14 ოქტომბერს, ევროკომისიის პრესსამსახურში განაცხადეს.
"ევროპის უცვლელი მხარდაჭერა ისე მნიშვნელოვანია, როგორც არასდროს, რათა უკრაინას დავეხმაროთ თავისი საჰაერო სივრცის დაცვასა და ადამიანების სიცოცხლის გადარჩენაში", — ხაზგასმით აღნიშნა ევროკომისიის ხელმძღვანელმა ურსულა ფონ დერ ლაიენმა.
თანხა გამოყოფილია კიევის მხარდასაჭერი 90 მილიარდი ევროს ოდენობის სესხის ფარგლებში. აქედან 60 მილიარდი ევრო გათვალისწინებულია თავდაცვის საჭიროებებისთვის, ხოლო 30 მილიარდი ევრო — საბიუჯეტო დახმარებისთვის 2026-2027 წლებში.
უკრაინა რუსეთის სრულმასშტაბიანი შეჭრის დაწყებიდან მეოთხე ზამთრისთვის ემზადება. თავდაცვითი აღჭურვილობის სასწრაფო მიწოდება გარანტიას იძლევა, რომ ქვეყნის შეიარაღებული ძალები შეძლებენ მშვიდობიანი მოსახლეობისა და ქალაქების დაცვას თავდასხმებისგან, აღნიშნეს ბრიუსელში.
2022 წლიდან ევროკავშირმა და მისმა წევრმა სახელმწიფოებმა უკრაინას სულ 231.5 მილიარდი ევროს ოდენობის მხარდაჭერა გაუწიეს, მათ შორის, 3.8 მილიარდი ევრო გაყინული რუსული აქტივებიდან მიიღეს.
წლის ბოლომდე ხელმისაწვდომია 17 მილიარდ ევროზე მეტი საბიუჯეტო დახმარება, იმ პირობით, თუ შესრულდება "უკრაინის გეგმასა" და ურთიერთგაგების მემორანდუმში გაწერილი პირობები, დასძინეს ევროკომისიაში.
აგვისტოში კიევი 2026 წლისთვის თავდაცვის დაფინანსების დამატებით დეფიციტს 27 მილიარდ დოლარად (24 მილიარდი ევრო) აფასებდა. ამ სახსრების ნაწილი საჭირო იყო უპილოტო საფრენი აპარატებისა და სხვა შეიარაღების წინასწარი ავანსის გადასახდელად, რომელთა მიღებასაც უკრაინა 2027 წლის დასაწყისში ვარაუდობდა.
უკრაინის ფინანსთა მინისტრმა სერგი მარჩენკომ 28 სექტემბერს DW-ს განუცხადა, რომ აგვისტოს შემდეგ დეფიციტი შემცირდა. ხარჯების ნაწილის, მათ შორის, სამხედრო მოსამსახურეთა ხელფასების დაფარვა შიდა წყაროების ხარჯზე მოხერხდა, ხოლო ზოგიერთი შესყიდვის განხორციელება დაგეგმილ ვადებში შეუძლებელი გახდა, დასძინა მან.
დარჩენილ საჭიროებებს კიევი პარტნიორებთან განიხილავს, მათ შორის, 2026 წელს 2027 წლის დასაწყისისთვის საჭირო შეიარაღებაზე ავანსის გადახდის შესაძლებლობას.
