ევროპის კომისია გამოდის ინიციატივით, ევროკავშირის წევრობის კანდიდატ ქვეყნებს ეტაპობრივი ინტეგრაციის ფარგლებში მეტი უპირატესობა მიანიჭოს. ამასთან, ინიციატივა ითვალისწინებს ახალი დამცავი მექანიზმების დანერგვას, რომლებიც შეზღუდავს მათ უფლებებს იმ შემთხვევაში, თუ ეს სახელმწიფოები ევროკავშირში მიღების შემდეგ რეფორმებს შეაჩერებენ ან თავიანთ ვალდებულებებზე უარს იტყვიან. შესაბამისი ცვლილებების პაკეტის მომზადების შესახებ სტრასბურგში ევროკავშირის გაფართოების საკითხებში ევროკომისარმა, მარტა კოსმა განაცხადა.
მისი თქმით, წინასწარმა შეფასებებმა იმისა, თუ რა გავლენა შეიძლება იქონიოს ახალი ქვეყნების გაწევრიანებამ ევროკავშირზე, აჩვენა, რომ "ევროკავშირი უკვე მზად არის გაფართოებისთვის, მაგრამ არსებობს სფეროები, რომლებიც კორექტირებას საჭიროებს". კერძოდ, იმისათვის, რომ ევროკავშირი "უფრო მოქნილი და ეფექტური გახდეს", კომისია გვთავაზობს ევროკავშირის ხელშეკრულებების ე.წ. გარდამავალი დებულებების გამოყენებას და ერთსულოვნების პრინციპის კვალიფიციური უმრავლესობით კენჭისყრით ჩანაცვლებას.
ამით ევროკავშირი შეძლებდა იმ საკითხთა წრის შევიწროებას, რომელთა გადაწყვეტაც ერთ ქვეყანას საკუთარი ვეტოთი შეეძლო დაებლოკა. საუბარია, კერძოდ, ევროკავშირში გაწევრიანების მოლაპარაკებების პროცესში მისაღებ შუალედურ გადაწყვეტილებებზე, როგორიცაა მოლაპარაკებების კლასტერების გახსნა, რისი მიღებაც ამჟამად ერთსულოვნებას მოითხოვს.
რაც შეეხება ეტაპობრივ ინტეგრაციას, როდესაც კანდიდატი სახელმწიფო, რომელიც წარმატებით ახორციელებს გარკვეულ რეფორმებს, იღებს წვდომას ევროკავშირის ზოგიერთ პროგრამასა თუ ფონდზე, ეს მიდგომა გაფართოების მეთოდოლოგიისთვის უცხო არ არის. ზოგიერთ ქვეყანას, მათ შორის უკრაინას, უკვე აქვს ასეთი უპირატესობები.
ამასთან, კოსი ამტკიცებს, რომ ევროკომისიის მიერ შემოთავაზებულ დოკუმენტში საუბარია "ევროკავშირის საქმიანობის ცალკეულ სფეროებში კანდიდატი ქვეყნების უფრო ამბიციურ ჩართულობაზე", კერძოდ, ენერგეტიკის, ტრანსპორტის, ხელოვნური ინტელექტის, უსაფრთხოებისა და თავდაცვის სფეროებში. ამავდროულად, ევროკომისარმა ხაზგასმით აღნიშნა, რომ ეტაპობრივი ინტეგრაცია არ არის სრულუფლებიანი წევრობის შემცვლელი, არამედ წარმოადგენს "გაფართოების პროცესის დამაჩქარებელ ინსტრუმენტს".
