16 ნოემბერს, ევროკავშირის ქვეყნების საგარეო საქმეთა მინისტრები მიიღებენ ახალ სანქციებს, რომლებიც რუსულ ნავთობგადასამუშავებელ ქარხნებსა და "ჩრდილოვანი ფლოტის" მომსახურე სტრუქტურებს შეეხება. ამის შესახებ ფინანსური მომსახურების საკითხებში ევროკომისარმა, მარია ლუიშ ალბუკერკემ, რომელიც ასევე სანქციების პოლიტიკის აღსრულებაზეა პასუხისმგებელი, 12 ნოემბერს, ბრიუსელში, ევროპარლამენტში გამართულ დებატებზე განაცხადა. კონკრეტულად რომელი ქარხნები და კომპანიები მოხვდებიან სიებში, მას არ დაუკონკრეტებია. როგორც წესი, ევროკავშირი მოსალოდნელი შემზღუდველი ზომების დეტალებს წინასწარ არ ახმაურებს.
როგორც მანამდე DW-ს ევროკავშირის დიპლომატმა განუცხადა, 16 ნოემბერს ევროკავშირის საგარეო საქმეთა საბჭოს სხდომაზე უკრაინის ტერიტორიული მთლიანობის, სუვერენიტეტისა და დამოუკიდებლობის ძირგამომთხრელი ქმედებების გამო სანქციების რეჟიმის ფარგლებში სანქციები 113 ფიზიკური და იურიდიული პირის მიმართ უნდა დაწესდეს, ხოლო კიდევ 31 პირის წინააღმდეგ - რუსეთის დესტაბილიზაციური საქმიანობის გამო დაწესებული რეჟიმის ფარგლებში.
ალბუკერკემ ასევე აღნიშნა, რომ პარალელურად ევროკომისია და ევროპის საგარეო ქმედებათა სამსახური რუსეთის ფედერაციის მიმართ სანქციების 22-ე პაკეტზე წინადადებების მომზადებას ასრულებენ.
"მზადდება 22-ე პაკეტი ზომების ფართო სპექტრით და ის უახლოეს მომავალში უნდა იყოს წარმოდგენილი", - განაცხადა მან დებატების ბოლოს. კონკრეტული ზომები და წინადადებების წარდგენის თარიღი ევროკომისარს არ დაუსახელებია.
