ესპანეთში, ხელმისაწვდომი საცხოვრებლის მოთხოვნით, მასობრივი აქციები გაიმართა

ხელისუფლების მონაცემებით, მხოლოდ ესპანეთის დედაქალაქში დემონსტრაციაში დაახლოებით 70 ათასი ადამიანი მონაწილეობდა, ორგანიზატორებმა კი 500 ათასი მონაწილის შესახებ განაცხადეს. საპროტესტო აქციები კიდევ დაახლოებით 50 ქალაქში გაიმართა. ბარსელონაში დაგეგმილი მიტინგი არახელსაყრელი ამინდის შესახებ გაფრთხილების გამო გადაიდო.

ვალენსიაში დემონსტრანტებსა და პოლიციას შორის ცალკეული შეტაკებები მოხდა, სამართალდამცველებმა მომიტინგეების წინააღმდეგ ცრემლსადენი გაზი და რეზინის ტყვიები გამოიყენეს. ათობით მომიტინგემ შეძლო შეჭრილიყო "ხელოვნებისა და მეცნიერების ქალაქში" — ვალენსიის ერთ-ერთ მთავარ ღირსშესანიშნაობაში. გარდა ამისა, უკვე ერთი კვირაა, ასობით ადამიანი კარვების ბანაკებს შლის მადრიდის ცენტრში და მთავრობისგან რეფორმებს ითხოვს.

ესპანეთის პარლამენტმა 2 ოქტომბერს მინიმალური უპირატესობით უარყო მთავრობის მიერ შეტანილი ორი დეკრეტი, რომლებიც მიმართული იყო საბინაო კრიზისთან ბრძოლისა და დამქირავებლების მხარდაჭერისკენ. სხვა საკითხებთან ერთად, ისინი ითვალისწინებდა მორატორიუმს ყველაზე მოწყვლადი კატეგორიის დამქირავებლების იძულებით გამოსახლებაზე 2030 წლამდე და ვადაგასული იჯარის ხელშეკრულებების ავტომატურ გახანგრძლივებას.

კანონპროექტების წინააღმდეგ ხმა მისცეს ოპოზიციურმა კონსერვატიულმა "სახალხო პარტიამ", მემარჯვენე პოპულისტურმა Vox-მა და კატალონიურმა სეპარატისტულმა პარტიამ Junts per Catalunya. ამის შემდეგ "სახალხო პარტიის" ლიდერმა ალბერტო ნუნიეს ფეიხოომ ესპანეთის პრემიერ-მინისტრს, სოციალისტ პედრო სანჩესს მოუწოდა, "რაც შეიძლება მალე" დანიშნოს ვადამდელი არჩევნები. მისი თქმით, ხელისუფლებაში რვაწლიანი ყოფნის შემდეგ სანჩესი არ სარგებლობს მხარდაჭერით "არც მოსახლეობაში და არც პარლამენტში".