დონალდ ტრამპის თქმით, ნარკოკარტელების წინააღმდეგ ხმელეთზე იერიშები მალე დაიწყება

 "ჩვენ ვაპირებთ, ხმელეთზე დარტყმების დაწყებასაც კარტელებთან დაკავშირებით. კარტელები მექსიკას მართავენ." - თქვა ტრამპმა, თუმცა გეგმების შესახებ კონკრეტულ დეტალებზე არ უსაუბრია.

ცნობისთვის, ტრამპის ბოლო განცხადებას წინ უძღოდა აშშ-ს მხრიდან რამდენიმეთვიანი სამხედრო ოპერაცია კარიბის ზღვისა და წყნარი ოკეანის რეგიონებში ნარკოტიკების კონტრაბანდაში ჩართული ნავების წინააღმდეგ.

ნარკოტრეფიკინგში ჩართული ნავების წინააღმდეგ საჰაერო იერიშების მიტანა აშშ-მ 2025 წლის სექტემბრიდან დაიწყო. არსებული ინფორმაციით, მას შემდეგ აშშ-მ ნავებზე 30-მდე იერიში მიიტანა, რასაც ჯამში დაახლოებით 107 ადამიანი ემსხვერპლა. 

ტრამპის ადმინისტრაციის მიხედვით, ნავები კრიმინალურ ორგანიზაცია Tren de Aragua-ს ეკუთვნოდა, რომელიც აშშ-მ უცხოურ ტერორისტულ ორგანიზაციად გასულ წელს გამოაცხადა.

"ჩვენ ვიტოვებთ უფლებას, დარტყმები განვახორციელოთ ნარკოტიკებით დატვირთული ნავების წინააღმდეგ, რომლებსაც ნარკოტიკები აშშ-ში შემოაქვთ". - თქვა აშშ-ს სახელმწიფო მდივანმა, მარკო რუბიომ იანვრის დასაწყისში.