აშშ-ის დაზვერვა მიიჩნევს, რომ ირანი ახლო აღმოსავლეთსა და მის ფარგლებს გარეთ ამერიკელ დიპლომატებსა და თანამდებობის პირებზე თავდასხმებს ამზადებს. ამის შესახებ გამოცემები Axios და Financial Times (FT) აშშ-ის ეროვნული დაზვერვის დირექტორის, ჯეი კლეიტონის მემორანდუმზე დაყრდნობით იუწყებიან.
23 ოქტომბრით დათარიღებული დოკუმენტი სახელმწიფო მდივან მარკო რუბიოს სახელზეა გაგზავნილი, რომელიც ასევე პრეზიდენტის მრჩევლის პოსტს იკავებს ეროვნული უსაფრთხოების საკითხებში. კლეიტონი მემორანდუმში ასევე მიუთითებს, რომ თეირანის მიერ მსგავსი ოპერაციებისთვის მზადებამ "მოწინავე სტადიას" მიაღწია, ამიტომ მოსალოდნელი თავდასხმების შესახებ ინფორმაცია შეიძლება, უფრო ფართო წრისთვისაც იყოს რელევანტური.
FT-ის ცნობით, დაზვერვის მონაცემები გახდა ერთ-ერთი მიზეზი, რის გამოც აშშ-ის სახელმწიფო დეპარტამენტმა ახლო აღმოსავლეთში ამერიკულ საელჩოებში პერსონალის რაოდენობის შემცირება დაიწყო.
ქვეყნის ხელისუფლება შიშობს, რომ ირანის მიერ მხარდაჭერილმა იემენელმა ჰუსიტებმა თავიანთი თავდასხმები შესაძლოა, საუდის არაბეთის ფარგლებს გარეთ, რეგიონის სხვა ქვეყნებზეც გაავრცელონ. სიტუაცია შეიძლება გაართულოს ნოემბრის დასაწყისში აშშ-ის კონგრესის შუალედური არჩევნების შემდეგ ირანის ისლამურ რესპუბლიკაზე აშშ-ისა და ისრაელის დარტყმების განახლებამ, აღნიშნავს Axios.
24 ოქტომბრის დილით, საუდის არაბეთის ხელმძღვანელობით მოქმედმა სამხედრო კოალიციამ განაცხადა, რომ ჰუსიტების მიერ ერ-რიადის მიმართულებით გასროლილი ბალისტიკური რაკეტა გადაიჭირეს. მანამდე ჰუსიტებმა განაცხადეს, რომ საუდის არაბეთზე რამდენიმე დარტყმა განახორციელეს. მათი სამიზნეები გახდა ქვეყნის თავდაცვის სამინისტრო ერ-რიადში, ნავთობკომპანია Saudi Aramco-ს ობიექტები იანბუში და ორი საერთაშორისო აეროპორტი აბჰასა და დამამში.
საუდის არაბეთის ხელისუფლების მონაცემებით, დამამის საერთაშორისო აეროპორტზე თავდასხმის შედეგად ორი ადამიანი დაიღუპა, კიდევ რვა კი დაშავდა. გარდა ამისა, შაიბას ნავთობის საბადოს თავზე, ჰაერსაწინააღმდეგო თავდაცვის საშუალებებით ჩამოგდებული უპილოტო საფრენი აპარატის ნამსხვრევების დაცემის შედეგად ორი ადამიანი დაიღუპა.
როგორც FT წერს, ენერგომატარებლების გლობალური ბაზარი შეშფოთებულია აშშ-ისა და ისრაელის ირანთან ომის ესკალაციის ახალი ტალღის პერსპექტივით, ასევე ნავთობის მსოფლიო მარაგების შესაძლო შემცირებით. წინა დღით, 2026 წლის აპრილის შემდეგ პირველად, Brent-ის მარკის ნავთობის ფასმა ბარელზე 117 დოლარამდე მოიმატა.
აშშ-ის პრეზიდენტმა დონალდ ტრამპმა უკვე დაუშვა, რომ შუალედური არჩევნების შემდეგ ირანის დაბომბვას განაახლებს. დარტყმების განახლებას მხარს უჭერს ისრაელის პრემიერ-მინისტრი ბენიამინ ნეთანიაჰუც, რომელსაც 27 ოქტომბერს ქნესეთის არჩევნები ელის.
