ამერიკის ხელისუფლებამ ირანის ბირთვული პროგრამის შესახებ ინფორმაციის სანაცვლოდ 20 მილიონ დოლარამდე ჯილდო და აშშ-ში შესაძლო გადასახლება შესთავაზა. ამის შესახებ შეიარაღებული ძალების ცენტრალურმა სარდლობამ (CENTCOM) სოციალურ ქსელ X-ში განაცხადა.
სარდლობის მონაცემებით, შესაბამისი შეთავაზება აშშ-ის სახელმწიფო დეპარტამენტის პროგრამის — Rewards for Justice-ის ფარგლებში მოქმედებს. ჯილდო გათვალისწინებულია ირანის ბირთვული პროგრამის შესახებ ცნობებისთვის, მათ შორის, მისი ობიექტების, აღჭურვილობისა და მასთან დაკავშირებული თანამშრომლების, აგრეთვე სამეცნიერო საზოგადოების წარმომადგენლების შესახებ.
პროგრამა 1984 წელს შეიქმნა ამერიკის მოქალაქეების სიცოცხლისა და შეერთებული შტატების ინტერესების დაცვისკენ მიმართული ინფორმაციისთვის სახელმწიფო ჯილდოების სისტემის ფარგლებში. კონკრეტული პირობები, რომელთა შემთხვევაშიც მიწოდებული ინფორმაცია 20 მილიონი დოლარის ოდენობით მაქსიმალური ჯილდოს მიღების შესაძლებლობას იძლევა, არ ზუსტდება.
როგორც აშშ-ის სახელმწიფო დეპარტამენტმა ჯილდოს შესახებ განცხადებაში აღნიშნა, ირანის მიერ ატომური ენერგიის საერთაშორისო სააგენტოს (IAEA) გარანტიების შესახებ ვალდებულებების შეუსრულებლობამ გამოიწვია ის, რომ სააგენტომ დაკარგა ძირითადი კომპონენტების, მაგალითად ცენტრიფუგების, წარმოებისა და მარაგების უწყვეტი მონიტორინგის შესაძლებლობა.
აშშ-ის პრეზიდენტმა დონალდ ტრამპმა არაერთხელ განაცხადა, რომ ამერიკის შეიარაღებულმა ძალებმა ფაქტობრივად, მთლიანად გაანადგურეს ირანის ბირთვული პროგრამა. "ჩვენ რომ ირანზე დარტყმა არ მიგვეყენებინა, დღეს თქვენ ისრაელი აღარ გექნებოდათ. მათ ბირთვული იარაღი რომ ჰქონოდათ, გამოიყენებდნენ. ისინი გაანადგურებდნენ მთელ ახლო აღმოსავლეთს", - აღნიშნა თეთრი სახლის ლიდერმა ფლორიდის შტატში, უესტ-პალმ-ბიჩში.
