ევროპის პარლამენტის 75-მა დეპუტატმა 14 ოქტომბრის ერთობლივ წერილში ევროკავშირის ხელმძღვანელობასა და ცალკეულ წევრ ქვეყნებს მოუწოდა, გააგრძელონ უკრაინისა და პრეზიდენტ ვოლოდიმირ ზელენსკის მხარდაჭერა აშშ-ის პრეზიდენტ დონალდ ტრამპის იმ განცხადებებისა და გადაწყვეტილებების საპასუხოდ, რომლებიც კვირას, 11 ოქტომბერს გამოცხადდა.
ევროპული საბჭოს სხდომის წინ, პარლამენტარებმა, მათ შორის, გერმანიიდან, მოუწოდეს მის თავმჯდომარეს, ანტონიუ კოშტას, ასევე EU-ს წევრი ქვეყნების სახელმწიფოთა და მთავრობათა მეთაურებს, გამოვიდნენ ერთობლივი განცხადებით იმის შესახებ, რომ ევროკავშირი "არ გახსნის ხელახლა თავის ბაზარს რუსული დიზელის საწვავისა და სხვა ენერგეტიკული პროდუქტებისთვის".
მიმართვის ავტორებს აუცილებლად მიაჩნიათ იმის დადასტურება, რომ EU არ წავა არანაირ დათმობაზე რუსეთთან მტკიცე ზავისა და მშვიდობის დამყარებამდე, ასევე "რუსეთისა და მისი თანამზრახველების მიერ ჩადენილი სამხედრო და აგრესიის დანაშაულებისთვის" მართლმსაჯულების აღსრულებამდე.
პარლამენტარებმა ასევე, მოითხოვეს რუსეთის მიერ უკრაინისა და მისი მცხოვრებლებისთვის მიყენებული ზიანის კომპენსირება. "ეს უნდა მოიცავდეს რუსეთის მიერ რეპარაციების გადახდას იმ ტკივილისა და ნგრევისთვის, რაც მან უკრაინასა და მის ხალხს მიაყენა", — აღნიშნულია მიმართვაში.
ევროდეპუტატებმა EU-ს ქვეყნებს მოუწოდეს, გააგრძელონ ძალისხმევა რუსული ენერგორესურსების მოხმარებაზე სრულ უარზე და დააწესონ სრული ემბარგო რუსულ გაზსა და ნავთობზე.
გარდა ამისა, პარლამენტარები გამოვიდნენ რუსეთის წინააღმდეგ სანქციების ახალი პაკეტის შემუშავების ინიციატივით, რომელიც, სხვა საკითხებთან ერთად, მიმართული იქნება ენერგომატარებლების ექსპორტიდან კრემლის შემოსავლების შემდგომ შემცირებაზე.
დასასრულს, წერილის ავტორებმა ევროპელ ლიდერებს მოუწოდეს, არ მიჰყვნენ დონალდ ტრამპის მიდგომას რუსეთისა და ე.წ. "ენერგეტიკული ზავის" მიმართ, რომელსაც მათ მცდარი უწოდეს. "ჩვენ მოგიწოდებთ, ერთგული დარჩეთ ჩვენი პრინციპული პოზიციის და მხარი დაუჭიროთ უკრაინას მანამ, სანამ ის გამარჯვებას არ მოიპოვებს", — ხაზგასმულია წერილში.
