ლევან ჭოღოშვილის პერსონალური გამოფენა „XX საუკუენე“ აერთიანებს მხატვრის მიერ 50 წლის განმავლობაში შექმნილ ნამუშევრებს. რადისონ ივერიას ექსპოზიცია მოიცავს ნამუშევრებს 1975-85-იანი წლების სერიიდან „განადგურებული არისტოკრატია“, 1970-1990-იანი წლების სერიიდან „ვენერა და მარ(ქ)სი“, და 2000-2010 წლებში შექმნილ ნამუშევრებს.
სერიაზე „განადგურებული არისტოკრატია“ ლევან ჭოღოშვილმა მუშაობა ჯერ კიდევ 1970-იან წლებში, სტუდენტობისას, დაიწყო და მას საფუძვლად დაუდო ქართული თავადაზნაურობის, ქართველ და საქართველოში დამკვიდრებულ უცხოელ ინტელექტუალთა (გერმანელების, პოლონელების) XIX-ის მეორე ნახევარში და XX საუკუნის დასაწყისში გადაღებული დოკუმენტური და ოჯახური ფოტოგრაფიები, რომლებზეც ასახულია 1920-1930-იან წლებში საბჭოთა ძალაუფლების მიერ ფიზიკურად განადგურებული საზოგადოებრივი ფენა.
ამ ძველი და აკრძალული ოჯახური და დოკუმენტური ფოტოგრაფიის გადმოტანას სხვა გამომსახველობით ფორმაში (ფერწერა, გრაფიკა) საფუძვლად თანამედროვე პოლიტიკურ-სოციალური და კულტურული კონტექსტი დაედო - ტერორის ათწლეულებმა, საზოგადოების სხვადასხვა ფენების ფიზიკურმა და მორალურმა განადგურებამ შექმნა ჩვენი თანამედროვე პოლიტიკური და კულტურული რეალობა. სერიის ჩვენება საბჭოთა პერიოდში შესაძლებელი იყო მხოლოდ არაოფიციალურ, დახურულ გამოფენებზე. ის საჯაროდ პირველად 1985 წელს გამოიფინა.
სერიიდან „ვენერა და მარ(ქ)სი“ -1970-80-იანი წლები
„ვენერასა და მარ(ქ)სის“ სერიაში ერთმანეთს სიმბოლურად ეჯაჭვება საბჭოური იდეოლოგიის რეპრესიული ნიშნების მთელი წყება, რომელიც ჭოღოშვილს ირონიამდე და ფარსამდე დაჰყავს. ეროტიზმი, როგორც პატრიარქალური, საბჭოურ-ტოტალიტარული ძალაუფლების დისკუსი, რომელიც ერთი მხრივ, ოფიციალურად აღიარებს გენდერულ თანასწორობას და ამავდროულად, ორთოდოქსულად კრძალავს ეროტიკის გამოხატვის, გამოვლენის ნებისმიერ ფორმას, უკვე 1980-იანი წლების შუახანებში „ვენერასა და მარ(ქ)სის“ სერიიდან ამის ყველაზე აშკარა გამოვლენა ხდება ნამუშევრებში „კალინინი და ბალერინები“ და „რევოლუცია“.
"სივრცის თავისებურების გათვალისწინებით შერჩეული იქნა სპეციფიკური ნამუშევრები. ვიდეო ნამუშევრები და ინსტალაციები არ არის აქ გამოფენილი. ძირითადად ძველი ნამუშევრებია. ზოგიერთი მათგანი დაკარგული იყო და ახლა მოხერხდა მათი პოვნა. დიდი მადლობა ორგანიზატორებს და სტუმრებს, რომლებიც გამოფენის გახსნაზე მოვიდნენ." - ლევან ჭოღოშვილი.
გამოფენის ნახვა თბილისი რადისონში შესაძლებელია ორი თვის განმავლობაში.
ღონისძიების მასპინძელია „სილქჰოსფითალითი“. გამოფენის წარმდგენი - კომპანია სილქნეტი.
