გლდანის რაიონს კიდევ ერთი ახალი სკვერი შეემატა. გამგეობამ ზაჰესში, შოთაძის მეორე შესახვევში სკვერის მოწყობა დაასრულა.
სამუშაოები 1 600 კვადრატულ მეტრამდე ფართობზე ჩატარდა. ტერიტორიაზე მოეწყო მოსასვენებელი პავილიონი, ბავშვთა გასართობი და ფიტნეს ზონები, დამონტაჟდა გარე განათებისა და სარწყავი სისტემები, მოიხატა კედლები, ჩატარდა გამწვანების სამუშაოები - დაიგო ბალახი და დაირგო ხე-მცენარეები. განთავსდა სკვერისთვის საჭირო ინფრასტრუქტურა.
აღნიშნული სამუშაოებისთვის გამგეობის ბიუჯეტიდან 447 940 ლარი დაიხარჯა.
დასრულებული სკვერი გლდანის რაიონის გამგებელმა ბესიკ კალაძემ დაათვალიერა.
