საგარეო ურთიერთობათა კომიტეტის თავმჯდომარე და ეუთო-ს საპარლამენტო ასამბლეაში მუდმივმოქმედი დელეგაციის ხელმძღვანელი ნიკოლოზ სამხარაძე მონაწილეობს ეუთო-ს საპარლამენტო ასამბლეის ზამთრის სესიაში, რომელიც ავსტრიის დედაქალაქ ვენაში იმართება.
ვიზიტის ფარგლებში ნიკოლოზ სამხარაძე ეუთო-ში კანადის, ესტონეთის, ირლანდიის, ლიეტუვის, ნორვეგიის, პოლონეთის, სლოვაკეთის მუდმივ წარმომადგენლებს და ასევე, აშშ-ს მუდმივი წარმომადგენლის მოადგილეს შეხვდა.
შეხვედრებისას განხილვის ერთ-ერთ მთავარ თემას ეუთო-ს 2024 წლის დღის წესრიგი წარმოადგენდა.
მხარეებმა მიმოიხილეს რეგიონული და გლობალური უსაფრთხოების საკითხები და გამოწვევები. ხაზი გაესვა სომხეთსა და აზერბაიჯანს შორის კონფლიქტის დარეგულირების პროცესში საქართველოს მნიშვნელოვან როლს.
ნიკოლოზ სამხარაძემ კოლეგებს საქართველოს ოკუპირებულ რეგიონებში არსებულ მძიმე ვითარებაზე და რუსეთიდან მომდინარე საფრთხეებზე მიაწოდა ინფორმაცია.
შეხვედრაზე ისაუბრეს საქართველოში 2024 წელს დაგეგმილ საპარლამენტო არჩევნებზე და ხაზი გაუსვეს ეუთო-ს, როგორც ნეიტრალური და ობიექტური დამკვირვებლის მნიშვნელოვან როლს ამ არჩევნებში.
ნიკოლოზ სამხარაძესთან ერთად შეხვედრაში საქართველოს საგანგებო და სრულუფლებიანი ელჩი ავსტრიის რესპუბლიკაში, საქართველოს მუდმივი წარმომადგენელი ეუთოსა და ქ. ვენაში განლაგებულ საერთაშორისო ორგანიზაციებში ქეთევან ციხელაშვილი მონაწილეობდა.
