უკრაინის პრეზიდენტმა, ვოლოდიმირ ზელენსკიმ თქვა, რომ 29 აგვისტოს პრეზიდენტის ოფისის უფროსი, ანდრეი ერმაკი და უკრაინის ეროვნული უსაფრთხოებისა და თავდაცვის საბჭოს მდივანი, რუსტემ უმეროვი ნიუ-იორკში აშშ-ს პრეზიდენტის, დონალდ ტრამპის გუნდს შეხვდებიან და უსაფრთხოების გარანტიებს განიხილავენ. ამის შესახებ ზელენსკიმ 27 აგვისტოს ვიდეომიმართვაში ილაპარაკა.
"ხვალ - შეხვედრა შვეიცარიაში. პარასკევს - აშშ-ში, ნიუ-იორკში შეხვედრა პრეზიდენტ ტრამპის გუნდთან. მოვიწვევთ ყველას, ვინც უსაფრთხოების გარანტიების შიგთავსზე მუშაობს - უსაფრთხოების გარანტიების სამხედრო, პოლიტიკურ და ეკონომიკურ კომპონენტებზე.
ამოცანას წარმოადგენს მაქსიმალურად აჩქარება, რათა ეს ასევე იყოს ბერკეტი, გავლენის ბერკეტი: რუსებმა უნდა დაინახონ, რამდენად სერიოზულად არის განწყობილი მსოფლიო და რამდენად ცუდი იქნება რუსეთისთვის შედეგები, თუკი ომი გაგრძელდება". - თქვა ზელენსკიმ.
ზელენსკიმ ასევე აღნიშნა, რომ მოლაპარაკებებთან დაკავშირებით მოსკოვიდან მომავალ უარყოფით გზავნილებს ყველა ამჩნევს და ხედავს, რომ რუსეთი არ აპირებს, დანაპირები შეასრულოს. მან ასევე მოუწოდა რუსეთზე ზეწოლის გაზრდისკენ.
