უკრაინის შეიარაღებული ძალების მთავარსარდალი ვალერი ზალუჟნი მიიჩნევს, რომ რუსეთთან ომი ახალ ეტაპზე გადადის: "პოზიციური, სტატიკური და დამღლელი ბრძოლა. მის მოსაგებად საჭიროა მაღალი ტექნოლოგიები." ამის შესახებ ზალუჟნი The Economist-ზე გამოქვეყნებულ სვეტში წერს.
მისი თქმით, ასეთი ომი რუსეთს სარგებელს მოუტანს, რადგან მას ძალების აღდგენის შესაძლებლობას აძლევს.
უკრაინის არმიის მთავარსარდალი თვლის, რომ ასეთ ვითარებაში უკრაინის შეიარაღებულ ძალებს სჭირდება ძირითადი სამხედრო შესაძლებლობები და ტექნოლოგიები.
"მათგან ყველაზე მნიშვნელოვანია საჰაერო ძალები. ცის კონტროლი აუცილებელია ფართომასშტაბიანი სახმელეთო ოპერაციებისთვის. ეს მოიცავს როგორც პილოტირებულ თვითმფრინავებს, ასევე დრონებს." - წერს ის.
ზალუჟნიმ აღნიშნა, რომ რუსეთი ახლა უკრაინასთან შედარებით მნიშვნელოვან უპირატესობას ინარჩუნებს ცაში და ეს ართულებს უკრაინის ჯარების წინსვლას.
უკრაინის მეორე პრიორიტეტი: რადიოელექტრონული ბრძოლის საშუალებები. გენერალი წერს, რომ "ელექტრონული ომი არის თვითმფრინავების წინააღმდეგ ომში გამარჯვების გასაღები."
მისი თქმით, ბოლო ათწლეულის განმავლობაში რუსეთმა ელექტრონული ომის ძალების მოდერნიზება მოახდინა, შექმნა ჯარების ახალი სახე და შეიმუშავა 60 ახალი ტიპის ასეთი აღჭურვილობა და რუსეთის ფედერაცია ახლა უფრო ძლიერია ამ მხრივ, ვიდრე უკრაინა.
ზალუჟნი ამბობს, რომ მიუხედავად იმისა, რომ უკრაინამ შექმნა მრავალი საკუთარი ელექტრონული თავდაცვის სისტემა, მას ასევე სჭირდება მეტი წვდომა მოკავშირეების ელექტრონულ სადაზვერვო საშუალებებზე.
მესამე ამოცანაა კონტრბატარეული ომი,ანუ მტრის არტილერიის განადგურება. ამ ომში არტილერია და რაკეტების გასროლა შეადგენს ყველა სამხედრო მისიის 60-80%-ს.
"როდესაც გასულ წელს უკრაინამ პირველად დასავლური იარაღი მიიღო, მათ საკმაოდ წარმატებულად იმუშავეს და გაანადგურეს რუსული არტილერია. მაგრამ ასეთი იარაღის ეფექტურობა მკვეთრად შემცირდა რუსული ელექტრონული ომის სისტემების გაუმჯობესების გამო." - წერს უკრაინელი გენერალი.
ზალუჟნი დასძენს, რომ რუსული კონტრბატარეული ცეცხლი ასევე გაუმჯობესებულია. ეს დიდწილად განპირობებულია ლანცეტის სისტემის უზუსტესი ჭურვების გამოყენებით, რომელიც მუშაობს სადაზვერვო დრონებთან ერთად და ზუსტი ჭურვების წარმოების გაზრდით, რომლებსაც მიწაზე მყოფი კორექტორების დახმარებით უმიზნებენ.
მისი თქმით, ჯერჯერობით უკრაინა ახერხებს რუსეთთან საარტილერიო პარიტეტის მიღწევას უფრო ზუსტი საცეცხლე ძალის წყალობით, თუმცა უფრო ნაკლებად. მაგრამ ეს დიდხანს ვერ გაგრძელდება.
"და ჩვენ გვჭირდება პარტნიორებმა გამოგვიგზავნონ საუკეთესო საარტილერიო სადაზვერვო აღჭურვილობა, რომელსაც შეუძლია რუსული საარტილერიო სისტემების მდებარეობის დადგენა," - ამბობს უკრაინის შეიარაღებული ძალების მთავარსარდალი.
მეოთხე საჭიროება არის გამნაღმველი ტექნოლოგიები. მისი თქმით, დასავლეთის მარაგი არასაკმარისი აღმოჩნდა რუსული დანაღმული ველების მასშტაბის გათვალისწინებით, რომლებიც ზოგჯერ 20 კილომეტრს აღწევს. როდესაც უკრაინული ჯარები ასუფთავებენ მტრის ნაღმებს, რუსეთი სწრაფად ნაღმავს მათ შორიდან მეტი ნაღმის გასროლით.
ზალუჟნი თვლის, რომ ამის პასუხიც ტექნოლოგიებშია: "უკრაინას სჭირდება რადარის სენსორები, რომლებიც ნაღმებს მიწაში აღმოაჩენენ და კვამლის სისტემები, რათა დამალოს ჩვენი გამნაღველების საქმიანობა. თავდაცვის ძალებს ასევე შეუძლიათ გამოიყენონ რეაქტიული ძრავები სამაშველო თვითმფრინავებიდან, წყლის ჭავლის მანქანები ან კასეტური საბრძოლო მასალა დანაღმული ველების გასაწმენდად, მიწაში ღრმად ჩასვლის გარეშე. ასევე დაგვეხმარება ახალი ტიპის ექსკავატორები."
მისი თქმით, მეხუთე და ბოლო პრიორიტეტი არის რეზერვების დაგროვება, რადგან უკრაინას შეზღუდული შესაძლებლობები აქვს, რომ რეზერვისტები საკუთარ ტერიტორიაზე მოამზადოს.
"ჩვენ არ შეგვიძლია როტაცია მარტივად მოვახდინოთ. უფრო მეტიც, რუსეთს შეუძლია დარტყმა მიაყენოს სასწავლო ცენტრებს. ასევე არის ხარვეზები უკრაინის კანონმდებლობაში, რომელიც მოქალაქეებს საშუალებას აძლევს თავი აარიდონ თავიანთი მოვალეობების მოხდას." - აცხადებს გენერალი ზალუჟნი.
უკრაინის არმიის მთავარსარდალმა აღნიშნა, რომ უკრაინა ცდილობს ამ პრობლემების გადაჭრას. ინერგება სამხედრო სამსახურში პასუხისმგებელ პირთა ერთიანი რეესტრი, ასევე იგეგმება გასაწვევი მოქალაქეების კატეგორიების გაფართოება. გარდა ამისა, დაინერგება "საბრძოლო წვრთნა," რაც ახლახან მობილიზებული და გაწვრთნილი სამხედრო მოსამსახურეების მოსამზადებლად ფრონტზე გამოცდილ ქვედანაყოფებში გაგზავნას გულისხმობს.
